Wade 50, Heat sa 3 OT

CEBU, Philippines - Makutas nga duwa ang gidangatan sa kumbate nilang Dwayne Wade sa Miami Heat ug Deron Williams sa Utah Jazz nga milanat og tulo ka overtime periods sa wala pa mulampos ang Heat sa ilang homecourt sa iskor, 140-129 sa nagpadayong aksiyon sa National Basketball Association (NBA) didto sa American Airlines Arena sa Miami, Florida.

Si Wade mitabla sa iyang career points ug diriyot na sab maka-triple double pinaagi sa pagburak og 50 puntos, 10 ka rebounds ug siyam ka assists aron baswaton ang Heat kinsa naghupot na karon og 36-29 nga baraha.

Sa regulation, naglabaw unta ang Jazz, 107-100 apan naka-iskor og 7-0 run ang Miami aron tablahaon ang iskor, 107 aron paghatod sa duwa sa unang overtime.

Nagsinukliay og puntos ang duha ka kampo lima ka higayon sa second overtime ug ang kataposan diha sa 3.4 segundos pinaagi sa jumpshot ni Williams.

Apan sa 3rd overtime, mi-arte pag-ayo sila si Wade ug mga kauban ug wala nila hatagi og higayon nga makasikit og usab ang Jazz kinsa adunay 41-25 nga baraha.

Si Jermaine O’Neal mi-iskor og 28 puntos alang sa Heat ug si Mario Chalmers midugang og 23 puntos samtang si Williams maoy nangu sa Jazz sa iyang 30 puntos, lima ka rebounds og 13 ka assists.

Si Carlos Boozer nga usa sab sa sinaligan sa opensa sa Jazz, mitampo og 20 puntos ug 13 ka rebounds og 25 puntos ug si Andre Kirilenko midugang og 12 puntos.

Mao kadto’y unang higayon nga ang Heat ug ang Jazz nakasinati og tulo ka overtime sukad pa sa tuig 1992.

"Just another day at the office," matud pa ni Wade human sa duwa.

Sa laing duwa, gilubong sa Chicago Bulls ang New Orleans Hornets, 97-79, naka ipsot ang San Antonio Spurs batok sa Houston Rockets, 88-85, na-upset sa Minnesota Timberwolves ang Charlotte Bobcats, 108-100, gikulata sab sa Denver Nuggets ang Los Angeles Clippers, 107-94 ug gipahilum sa Phoenix Suns ang Oklahoma City Thunder, 106-95.  - Gabby G. Malagar (BANAT NEWS)