Guardo pabor sa regional training

CEBU, Philippines - Ang bag-ong natudlo nga ABAP project director sa Region 7 nga si sportsman Jonathan Guardo, mipadayag nga mas mopabor mopahigayon og training sa amateur boxers sa rehiyon kaysa ipadala sila sa national training pool diin mangiwit sila sa internasyonal  nga mga kompetisyon. 

 Si Guardo, kinsa nakighimamat ni ABAP regional president Nemesio Monton sa miaging semana diin gitunol ngadto kaniya ang   appointment letter, nagkanayon nga ang Cebu adunay daghang mga batan-ong boksidor ug aduna sab kini modernong kahimanan nga kapuslan alang sa training program.

 “It is crucial that they are not that far from their families, so they can still be guided, and besides, we have some of the best facilities and coaches here. So why send them elsewhere?” pangutana   ni multi-awarded Cebuano sportsman.

 Usa sa gitumbok ni Guardo nga adunay sarang kahimanan mao ang ALA Boxing Gym nga nakahimo na og daghang banggiitang boxer ug nakadagit na og daghang titulo.

 “I’ve heard there had been several ALA fighters in the past who were recruited to the national team, only to come back to Cebu after a few days as they could not adjust to the system at the national training pool,” matud pa ni Guardo.

 Sa laing bahin, malaumon si Guardo nga sa bag-ong management sa ABAP nga gipangulohan ni businessman Manny Pangilinan ug Ricky Vargas maresolba na unya ang tanang nakahasol kanila kabahin sa training

 program alang sa mga masaaron ug batan-ong boksidor.

 Sa miaging semana, si Guardo nibisita usab sa Yani Sta. Cruz gym sa Talisay City, diin ang ubang mga batan-ong boksidor nagbansay-bansay ubos ni trainer Nonito Donaire Sr.

Mao kini ang iyang unang opisyal nga pagbisita ni Guardo sa usa ka boxing gym sukad natudlo isip regional project director. – BANAT NEWS