Cebu Movers abante sa semis sa GAA 9th Founder's Cup

CEBU, Philippines - Mi-abante na ngadto sa semifinals sa Guadalupe Athletic Association (GAA) 9th Founder’s Cup ang Cebu Movers System ni playing coach Boy Te pinaagi sa pagdemolis sa Agencia Grande, 86-54 niadtong Domingo didto sa Guadalupe Sports Complex.

Gumikan sa maong kadaugan, ang Movers maoy makigharong batok sa Augla Hardware sa knockout semifinals karong Marso 15. Miabante sab sa semifinals ang Augla human midaog sa kulbahinam nga duwa batok sa Aqua Serv sa iskor, 55-54.

Si Inting Reyes mibahog og 24 puntos aron pangulohan ang Movers, samtang si Benjie Capili mao sab ang nangulo sa Agencia Grande sa iyang 17puntos.

Ang Platoon 2171 nga gipangulohan ni Jimbo Noel maoy unang nakakuha’g luna sa semifinals human mikulit og 76-68 nga kadaugan batok sa AC Sports ni Archie Baba.

Ang Ram Boys ni kanhi bise gobernador Enric Rama mipakagaging sa Pecus Stallions sa iskor nga 77-70 aron pagpuwersa og tinaktakay nga duwa sunod semana.

Ang modaog sa duwa tali sa Pecus Stallions ug Ram Boys maoy makigsangka batok sa Platoon 2171 sa semifinals.

Puntos Matag Usa

Cebu Movers (86) - Reyes 24, Elizalde 14, Labra 14, Lodonia 8, Gonzales 8, Alquizola 6, Te 6, Suzara 2, Ancot 2, Leyson 2

A. Grande (54) - Capili 17, Ricaña 14, Oyanguren 7, Delos Sientos 6, Tablada 4, Sormillon 2, Du 2, Fernando 2. – BANAT NEWS