Yamaha mosuporta sa OZ Racing
CEBU, Philippines – Ang Yamaha Motors Philippines, Inc. (YMPI) mopaluyo sa sunod-sunod nga lumba nga pagapasiugdahan sa OZ Racing Corporation.
Nakonkreto ang kasabotan sa OZ Racing Corp. ug Yamaha Motors pinaagi sa contract signing ni Chad Mascarinas sa ngan ni OZ Racing president Zandro Fajardo ug ni YMPI Sales and Marketing Director Takeshi Yano niadtong Sabado didto sa Fine Cuisine sa Parkmall sa Mandaue reclamation area.
Ang pagpinirmahay gisaksihan sab ni Norkis Business Development Manager Scout Tumulak.
Ang Yamaha kanunay'ng mopaluyo og racing nga nakapahimo kanila nga no. 1 team sa local racing. Ang Yamaha racing team nga mihakot og daghang awards sa miaging tuig gilangkuban nilang Maico Buncio, Jaime Barcial, Anthony Roman ug Jeffrey Chan.
Sila usab ang nirepresentar sa Yamaha Phils. sa ASEAN Cup niadtong Enero didto sa Thailand.
Ang OZ Racing Grand Prix Series gibuwag ngadto sa lima ka leg nga ipahigayon sa nagkadaiyang race tracks -- Parkmall, Kartzone sa Panagdait sa Brgy. Mabolo ug sa dakbayan sa Danao.
Mosikad ang unang leg karong Marso 28-29 diha sa Parkmall.
Ning tuiga, ang kategoriya nga tigian mao ang beginners open 110 superstock, beginners open 125 superstock, automatic mix open, novice open ug expert open.
Mga koponan nga mosalmot mao ang reigning expert open champion Team OZR, defending novice open titlist Norkis Yamaha, Bradz Racing, Drei Bikers, Team Mac, TeamPidot Skut Garage, Team X-Racing ug uban pa. –BANAT NEWS
- Latest
- Trending
