3 ka Sugbuanon 'pasar sa Jr. NBA training camp

CEBU, Philippines – Tulo ka batan-ong magduduwa gikan sa Cebu, duha sa Manila ug usa gikan sa Isabela Province ang nakapasar sa Jr. NBA National Training Camp ug mahisakop sa 2008-2009 Jr. NBA Philippines Team nga mopakita dili lang sa talento sa basketbol, apan ingon usab sa Jr. NBA S.T.A.R Values of Sportsmanship, Teamwork, (Positive) Attitude and Respect.

Si Carlo Escalambre, 14-anyos gikan sa Casa del Niño Montessori sa Isabela; Michael Jay Javelosa, 13-anyos sa Ateneo de Manila Grade School; Mark Jayven Tallo, 14-anyos sa Cebu Institute of Technology; Aldrin C. Fedigero sa Pasay City South High School; Arc Gabrielle Araw-Araw, 13-anyos ug Adrian Marvin Muller, 13-anyos sa Sacred Heart School-Jesuit nga nagbase dinhi sa Sugbu, pahalipayan tungod sa ilang kalamposan ug dad-on kini ngadto sa New York ug sa New Jersey karong Abril aron motan-aw og duwa sa NBA uban sa ilang counterpart US Jr. NBA Team.

Ang event presentor Hi-Smart mohatag sab og libreng usa ka tuig nga Hi-Smart Multivitamins +Zinc ug Taurine products ngadto sa mga sakop sa Jr. NBA Philippine Team ug duha ka bulan sa tanang 34 campers.

Si Mark Jayven Tallo, anak ni kanhi PBA Pepsi player Mark Anthony Tallo, maoy napiling Hi-Smart MVP.

Lain pang mga awardees mao sila si Carlo Escalambre (Caltex Sportsmanship Award), Carlos Nicolo Mercado (BTV Rising Star Award) ug Bradley Bacaltos (Gatorade High-Scorer Award).

Si coach Frank Lopez Jr., ang US-based Jr. NBA coach, kinsa maoy nipadagan sa clinic dinhi sa Pilipinas sukad pagsugod niadtong Nobiyembre, nagkanayon nga ang unom ka batan-ong players pulos mga maayo’g talento sa basketbol nga maoy gipangita sa Jr. NBA sa tuyo nga makahatag og maayong kaugmaon.

Si Lopez giabagan sa pagpadagan sa training sa PBA  legends Elmer Cabahug, Ronnie Magsanoc, Benjie Paras, Jolly Escobar ug Jerry Codiñera, kinsa magsilbeng local Jr. NBA coaches. –BANAT NEWS