Enervon/UC miarangkada

CEBU, Philippines - Gipakita ni Moncrief Rogado ang ebedinsya nganong siya maoy nahimong hari sa three-point shootout sa CESAFI dihang iyang gipangulohan ang Enervon/UC Webmasters pinaagi sa iyang 29 puntos diin ang siyam niini gikan sa three-point area alang sa ilang yanong 87-69 nga kadaugan batok sa Virginia/CIT Wildcats sa miaging gabii atol sa nagpadayong CESAFI Partner’s Cup didto sa Cebu Coliseum.

Didto sa nagdasok nga Dumanjug Sports Complex, ang Aerosoll/USC Warriors midaug batok sa CDO Idol/USPF Panthers sa iskor 83-76 aron pagbuak sa ilang 2-3 nga tabla sa standing.

Ang nahisgotang bearing game gipasiugdahan sa municipal government sa Dumanjug, habagatang Sugbo ubos ni Mayor Cesar Baricuatro ug tungod sab sa paningkamot sa legendary Warrior nga si Julian A. Macoy.

Tungod sa maong kadaugan, ang Webmasters kinsa naghupot na karon og 5-1 nga baraha, opisyal nang nakakuha sa ikaduhang pwesto bisan og unsa pa’y mahitabo sa ilang duwa batok sa nagsukarap nga Ave Maria/USJ-R Jaguars unya sa Marso 5.

Ang pinakataas maabtan sa Webmasters kung modaug sila batok sa Jaguars mao ang 6-1 apan kung mapilde, motapos sila sa 5-2 nga baraha ug hayan motabla sab sa Prime Asia/UV Lancers apan tungod kay ilang gipilde ang UV, ang Webmasters mao gyu’y makakuha sa ikaduhang pwesto pinaagi sa winner-over-the-other rule.

Si Rogado, ang CESAFI record holder sa pinakadaghang puntos nga nahipos sa three-point contest sa iyang 44 puntos kaniadtong Septyembre 9, 2008 samtang nagduwa pa sila sa USPF Panthers, mihimo’g siyam ka triples ug duha lang ka puntos ang gikan sa duol aron pangulohan ang Webmasters sa opensa sa iyang 29 puntos. Mas ganado silang motirada sa layo kay ang 6-9 nga higante nga si June Mar Fajardo sayon ra kaayong makapunit sa mga usik sa iyang pagdominar sa ilawom.

Si Fajardo mismo ug si Edward Pao maoy mi-abag kang Rogado sa opensa. Si Fajardo mihakot og 18 puntos ug si Pao midugang og 14 puntos.

Si Sherwin Abobo maoy nangu sa Wildcats sa iyang 24 puntos apan wala makaduwa sila si ex-pro Gilbert Demape ug Jerry Jaca tungod sa ilang trabaho.

Ang Webmasters igo lang naglabaw og duha ka puntos, 32-30 sa halftime apan dihang nagsugod na og pangigo sa gawas si Rogado, wala na sila kapungngi.

Didto sa Dumanjug diin nagbuwag ang dalan sa Warriros ug Panthers sa ilang 2-3 nga baraha sa wala pa ang duwa, si Joven Cid Cortes mi-iskor og 21 puntos alang sa Warriors kinsa mipalambo sa ilang baraha ngadto sa 3-3 ug ang Panthers mikanaug ngadto sa 2- 4 nga baraha. Si Elvis Labares maong nangu sa Panthers sa iya sab nga 21 puntos.

Ang Warriors naglabaw sa halftime, 41-40 apan nabiyaan una sila sa first quarter, 22-28 apan dihang nakontrolar na nila ang duwa sugod sa third quarter, 61-53, wala na makasikit og usab ang Panthers.

Puntos kada usa:

Enervon/UC (87)— Rogado 29, Fajardo 18, Pao 14, Ramos 6, Gomez 5, Agas 3, Mohamad 3, Abella 2, Julinae 2, Babad 2, Miranda 2, Luceño 2

Virginia/CIT (69)— Abobo 24, Resilla 13, Dela Cerna 8, Reyes 6, Regis 5, Cabañero 5, Lopez 3, Cañete 3, Molero 2 Halftime 32-30

Dumanjug, Cebu

Aerosol/USC (83)— Cortes 21, Padayao 10, Bautista 9, Padillo 8, Hermosa 8, Panerio 8, Codilla 6, Bercede 4, Gallarde 3, Cantonao 2, Otida 2, Joven 2

CDO Idol/USPF (76)— Labares 21, Sereño 17, Bardilla 13, Gulane 12, Rivera 3, Filoteo 3, Durano 2 Halftime: 41-40. – BANAT NEWS