Cebuano athletes walay kukaluya mihakot og korona sa PRISAA National Games

CEBU, Philippines - Walay kukaluya nga mihakot og korona ang mga Sugbuanong atleta human midaog sa laing duha ka events sa 2009 Private Schools Athletic Association (PRISAA) Regional Games nga didto gipahigayon sa managlahing binyu sa Dumaguete City.

Human manghawod sa athletics, women's lawn tennis ug sa table tennis, ang mga atleta sa Sugbu misakmit og titulo sa swimming, badminton, basketball, chess, dancesport, football, taekwondo, karatedo ug men's and women's volleyball.

Si Angela Alinabo midugang og laing korona human midaog sa Miss PRISAA ug singing titles niadtong Biyernes sa gabii.

Bugtong events nga napalpak ang Sugbuanon mao ang men's lawn tennis ug women's futsal.

Ang Sugbuanong swimmers nga gipangulohan sa University of San Carlos (USC) mikabkab og 16 golds, walo ka silvers ug lima ka bronzes sa men's events, samtang sa women's team nakakuha og 6-gold, 7-silver ug 5-bronze medal tally.

Si John Solon maoy nangu sa puwersa pinaagi sa pagdaog sa 200m freestyle. Sila si Vincent ug Gwencet Canada mihakot og golds sa 50m butterfly ug 100m breaststroke, samtang si Kruzette Solijon mihakot og bulawan sa 800m freestyle.

Ang men's ug women's teams sa USC maoy naghari sa relay competitions.

Laing team nga gidala sa USC, ang women's quintet nidaog sab og gold sa basketball human miposte og sunod-sunod nga kadaugan. Ang Cebu unang nidaog batok sa Bohol, 96-74 ug dayon ang Negros Oriental, 61-38.

Ang USC women's futsal team napakyas pagdaog og gold dihang napilde ngadto sa Foundation University, 3-4 pinaagi sa penalty shootout.

Midaog ang men's basketball team sa Cebu human ilang gilubong ang Bohol, 70-48. Ila sab nga gilubong ang Dumaguete, 84-61.

Kagahapon, ang men ug women volleyball teams sa Cebu midaog sab og korona human gipilde ang ilang tagsa-tagsa ka kaatbang. Ang Cebu mipukan sa Silliman University aron sakmiton ang women's volleyball title ug ang men's volleyball team midaog batok sa Negros Oriental. – BANAT NEWS