Maribago misakmit sa korona

CEBU, Philippines - Gilumsan sa Maribago Seaview Penzionne ang karibal POBY Divers, 87-72 aron langkaton ang titulo sa 35-above sa Lapu-Lapu Basketball Association (LLBA) Anniversary Cup dili pa dugay didto sa Lapu-Lapu Sports Complex.

Wala mapugngi ang pagpanginit ni Ram Gomez ug miugbok kini'g 17 puntos nga igo na kaayo alang kaniya nga ilhong most valuable player.

Miabag sab si Raul 'The Magician' Amores, kinsa miabuno og 13 puntos alang sa Maribago Seaview Penzionne.

Samtang si L. Agusto maoy nangulo sa pilderong POBY Divers pinaagi sa iyang 21 puntos, gisundan nilang I. Hiyas ug Dihayco nga mitampo og 10 puntos matag usa.

Sa laing aksiyon, ang San Remigio Beach Resort (SRBR) mao sab ang miguwang kampiyon sa "Invitational" human gilumpag ang Oyaomors Builders sa iskor nga 88-86.

Ang kanhi UV Lancer nga si Dela Pesa maoy nangulo sa SRBR nga mitugpo og 22 puntos, samtang si Degamo, kinsa milugit og 21 puntos mao sab ang nangulo sa Oyaomors Builders.

Ang maong torneyo nga gihalad alang sa Sto. Niño, ang Patron Saint sa Mactan, nahimo pinaagi sa paningkamot ni Allan Senerpida, kinsa maoy committee chairman, Dante Malingin, Virgilio Godinez ug Billy Nadado uban sa suporta ni Datag-Maribago Hon. Brgy. Captain Joseph Pangatungan.

Gipaluyohan sab kini ni Brgy. Captain ug Lapu-Lapu City First Lady Paz Radaza.

Puntos Matag Usa

Unang duwa:

MARIBAGO (87) - Gomez 17, R. Amores 13, M. Bancale 7, Villamor 7, Lamoste 5, Ciriaco 5, Aying 4, Gigante 4, A. Ompad 3, Bontes 2, D. Bancale 2, Amodia 2, J. Agosto 2, N. Ompad 2

POBY DIVERS (72) - l. Agusto 21, Dihayco 10, I. Hiyas 10, Tubo 7, Suico 6, Castreras 4, Lungay 4, Alecer 3, Cosep 3, Ngujo 2, J. Hiyas 2

Ikaduhang duwa:

SAN REMIGIO BEACH RESORT (88) - Dela Pesa 22, Lao 16, Denison 12, Basco 8, Abad 7, Cortes 6, Brozon 6, Ramos 5, Maranio 3, Auditor 2, Alano 1

OYAOMORS BUILDERS (86) - Degamo 21, Beredo 17, Amores 15, Sala 10, Resilla 8, Bonganciso 5, M. Pancio 5, Murata 4, Soroño 2. – BANAT NEWS