Colveta naka-eskapo sa Vernel

CEBU, Philippines - Gipakaging sa sitio Colveta ang mas inilog nga Vernel team   ni Danny Duran pinaagi sa pag-iskor og nipis nga kadaugan, 78-77 nga kadaugan aron magsolo sa liderato sa nagpadayong Better Run Basketball Association (BERBA) niadtong Domingo didto sa Ma. Gochan Sports Complex sa Brgy. Mambaling, ning siyudad.

Ang Vernel miposte og siyete puntos nga labaw, 61-54 sa fourth period luyo sa mga paningkamot nilang Michael Arias ug Burt Tabalin, apan ang Colveta kalit lang nanginit sa nagkaupos na ang oras aron tablahon ang iskor, 76-all sa nahabiling 32 segundos sa duwa.

Hayag na unta ang kadaugan sa Vernel, apan misipyat si Duran og usa sa duha niya ka free throws ug igo lang silang milabaw og uno punto, 77-76. Sa sunod posisyon, milansang si Tikboy Tradio sa iyang winning lay-up alang sa Colveta sa katapusang 13 segundos sa dili pa mototot ang buzzer.

Ang Colveta nagbitbit karon og 5-1 win-loss record, samtang ang Vernel midailos ngadto sa 4-2 nga baraha.

Si Tradio maoy nangulo sa Colveta pinaagi sa iyang 22 puntos, samtang sila si Walas Vergara ug Lito Rentuma nagkumboya og 28 puntos alang sa maong kadaugan.

Sa sayo pa, ang Conor Express ni team owner Elmer Hamis ug coach Dodoy Cuarto, mipukan sa Cavs sa iskor, 74-69 aron pag-angkon og 4-2 nga baraha, samtang ang Cavs nakabaton og 2-4 nga baraha.

Si Junrey Ledesma maoy nangulo sa Conor Express pinaagi sa iyang 20 puntos, samtang si Egang Tabalin midugang og 15 puntos. Sila si ex-USP Panther Alix Albaño ug Rashid Hamis mitampo og 10 puntos matag usa.

Sa laing duwa, ang Left Over milatigo sa Bucks, 91-78 alang sa ilang ikaduhang daog sulod sa unom ka duwa. Ang Bucks nahiagom sa ilang ikalimang kapildihan batok sa usa ka daog.

Puntos Matag Usa

Unang duwa:

Conor (74) - Ledesma 20, E. Tabalin 15, Albaño 10, Hamis 10, Romeo 6, Ocañada 4, Capacite 3, P. Tabalin 3, Pumareja 2, Suerte 1

Cavs (69) - Sestoso 17, Pacunla 14, Delos Angeles 13, J. Gador 12, Sarabia 6, Manzano 4, Arong 3

Ikaduhang duwa:

Colveta (78) -Tradio 22, Vergara 17, Rentuma 11, Dy 7, Macion 7, Seiga 5, Quiño 4, Abrera 3, Taboada 2

Vernel (77) - Ceballos 18, Arias 14, Campos 12, B. Tabalin 10, Mosqueda 6, Carcueva 4, Villarta 4, Duran 3, Gador 2

Ikatulong duwa:

Left Over (91) - Millior 21, Llamado 18, Maguinsay 14, V. Cañete 11, F. Cañete 10, Calvo 6, Medalla 5, Valle 4, Fernanez 2

Bucks (78) - Pacunas 25, Sasan 22, Omeres 14, Managaytay 10, Ebo 7. – BANAT NEWS