Pulos buaya?

CEBU, Philippines - Sulod ning semanaha ug sa pipila ka adlaw nga milabay, atong mabasahan nga daw sa naglumba og pasikatay kini sila si Kobe Bryant sa Los Angeles Lakers ug si LeBron James sa Cleveland Cavaliers ilabi na kun puntos ang hisgotan.

Swerte kini sila si Kobe ug Lebron kay sila man maoy mga sinaligan ug dili nato malalis, sila maoy mga superstars sa ilang team. Bisan og unsay ilang himuon sa korte adunay pagtugot sa ilang mga coaches --- Phil Jackson sa Lakers ug Mike Brown sa Cavs.

 Kun dinhi pa kini sa atong nasud, matawag kini sila si Kobe ug LeBron nga buaya ug maayo na lang gani kay sa ilang pagka-buaya, ila man napamatud-an nga modaog gyud ang ilang team tungod sab sa ilang paningkamot.

Kun dinhi pananglit sa PBA, bation na tingali kita'g kapuol nga matag adlaw adunay record nga makulit sila si Kobe ug LeBron kun mga players pa sila sa PBA. Apan didto sa NBA diin talagsaon og mga abilidad ang mga basketball players, kabahin kini sa ilang tinguha pagdaug apan kun puntosay lang, dili na bentahaan si Wilt Chamberlain kinsa mipuntos og 100 sa usa lang ka duwa dihang ang iyang karaang Philadelphia Sixers midaog batok sa New York Knicks niadtong Marso 2, 1962.

Si Michael Jordan kusog sab kaayo mo-iskor ug siya maoy daku'g papel dihang ang Chicago Bulls midaog og unom ka korona sa NBA. Si Bernard King kanhi sa New York mi-iskor og 60 puntos ug sila si Larry Bird sa Boston Celtics ug Tim Hardaway kanhi sa Miami Heat mga sinaligan sab sa ilang mga teams.

 Ang uban lang tingali, walay swerte kay ang mga kauban dili man sab kaayo maayong laki. Depende man gyud kini sa salary cap kay kun imong tiponon tanang mga maayong laki nga players, mabangkaruta sab ang usa ka team.

Gani si Julian Macoy kanhi sa USC Warriors (1955-1956) mi-iskor man og 126 puntos sa usa ka duwa sa kanhi CAAA. Mas labaw pa kadto ni Chamberlain. Si Felix Duhig ang kanhi CIT Wildcats, mi-iskor sab og 30 ka triples nga usa ka record sa CAAA sa ulahing bahin sa 1990's.

Si Allan Caidic maoy record holder sa PBA pinaagi sa iyang 79 puntos dihang nagduwa pa siya sa Tivoli Ice Cream niadtong Nobiyembre 21, 1991 ug si Paul Alvarez nga kanhi gikan sa San Miguel Beer mi-iskor og 71 puntos apan gitablahan kini sa upat ka mga PBA imports nga sila si Norman Black, Percy Davis, Billy Ray Bates ug Carlos Briggs.

Ang import nga si Tony Harris sa Swift Mighty Meaty maoy naghupot sa labing taas nga iskor sa PBA human siya mikulit og 105 points niadtong Oktubre 10, 1992 sa usa ka out-of-of town game didto sa Iloilo City. Ang unang import nga nakakuha'g 103 puntos mao si Michael Hackett sa Ginebra niadtong Nobiyembre 21, 1985.

Balik ni Kobe, siya maoy labing bata nga NBA player nga nakaabot og 23,000 point plateau atol sa ilang pagdaug batok sa Oklahoma City Thunder, 105-98 sa miaging adlaw. Si Kobe nag-edad og 30 anyos ug 171 ka adlaw ug iyang nalabwan si Chamberlain kinsa naka-iskor og 23 mil sa edad 30 anyos ug 176 ka adlaw.

Hinuon, si Chamberlain gihapon ang labing bata nga nakakuha sa maong puntos sa 606 lang ka duwa kun itandi ni Kobe nga nakaabot sa maong puntos sa iyang ika-917 nga duwa.

Dili pa lang dugay, si Kobe mi-iskor og 61 puntos batok New York ug si LeBron mi-iskor og 52 batok sa maong team.

Niadtong Miyerkules, mi-iskor og 34 puntos si Kobe batok sa Thunder ug si James mi-iskor og 47 puntos batok sa Indiana Pacers apan walay swerte kay pilde intawon sila, 95-96. Buot pasabot, mas maayo'g self-discipline si Kobe kay kang Lebron.

 Ug dili sab kini malalis, pulos man tingali buaya sila si Kobe ug LeBron apan maayog record ang Lakers kay sa Cavs, 42-9 batok 40-11 ning akong pagsuwat.

 Ambot nganong wala man kini kuhaang endorsers sa Lacoste sila si Kobe ug Lebron didto man hinuon sa mga produktong sapatos.

* * *

Kining inyong alagad sa SPORTSgab mahiligon kaayon ni sa tagna-tagna ug akong idolo si Nostradamus.Niadtong Domingo sa hapon samtang nag-desk ako sa Banat Sports miduol nako ang among proofreader nga si Jonald Raganas ug nangutana kun kinsa'y mahimong kampiyon sa PBA. Niadtong tungora, 3-2 ang record sa Aces batok sa Talk 'N Text Phone Pals.

Diha duol kanako si Erning Tiro, ang usa sa mga production staff ug nakadungog siya nga yano kaayo nakong gitubag si Jonald nga kun makatabla sa 3-3 ang Phone Pals, sila maoy mahimong kampiyon ug niadtong Domingo, misalir ang akong pagka Nostradamus kay ang Phone Pals may nahimong kampiyon sa Game - sa iskor, 93-89 ug si Macmac Cardona maoy nahimong Finals MVP.

Dili sab nako hikalimtan nga niadtong AUBC diin nag-ilog sa finals slot ang China ug Korea, akong gitag-an nga ang China maoy modaug ug labing menos lima ka puntos---- kalooy sa Diyos tukma gyud nga lima ra gyug ka puntos ang gidag-an sa China ug dayong katawa sa among Freeman sports editor nga si Manny V (dili Villar) Villaruel nga replay kuno ang maong duwa ug miabot sa opisina sa Freeman ang iyang pagpanabi nga replay ang maong duwa sa alimpatakan ni SPORTSgab.Hehehe. Taghap lang to mga Bro.

* * *

SG Miscellaneous. Belated fiesta greetings to my friends at Punta Princesa last February 11 and to my friends at sitio NABA, Alaska, Mambaling yesterday, February 15. -  BANAT NEWS