CEBU, Philippines – Napugngan sa Mambaling ang laraw sa Guadalupe paglansang og sunod-sunod nga kadaugan pinaagi sa paghari sa Hipodromo leg sa Go Ching Hai Martina-M. Lhuillier Cup Inter-Barangay Dancesport and Hip-Hop Competition.
Ang Mambaling mikubkob og duha ka golds ug lima ka bronzes.
Mikabkab sab ang Guadalupe og duha ka bulawan, apan napunta kini sa ikaduhang dapit gumikan kay mas ubos sila og natiltil nga bronze medals.
Sila si Jason Milla ug Katheren Palelio maoy nangulo sa kadaugan sa Mambaling human nanghawod sa latin and modern standard junior division.Naka-gold ang Guadalupe kortesiya nilang Glaren Roi Saldua ug Naditha Marie Manubag sa juvenile standard ug latin action.
Mi-okupar sa ikaupat nga dapit ang Pasil sa ilang usa ka gold ug usa usab ka silver, gisundan sa Buhisan nga adunay usa ka gold.
Sila si Mark Orcullo ug Christine Abellana maoy mitunol og bulawan sa Pasil kortesiya sa youth open standard ug usa ka silver sa latin category nga gidominar nilang Jimmy Jabonero ug Jackielyn Fuentes sa Buhisan.
Ang Tejero, Basak, San Nicolas ug Labangon parehong mihakot og silver medal, samtang ang Hipodromo mikab-ot lang og bronze sa open class.
Sila si Christian Talsi ug Gay Omega maoy naghari sa juvenile latin, samtang sila si John Repunte ug Alanis Bancal maoy nanghawod sa standard event.
Ang tandem nilang Warren Tuico ug Rochelle Diola maoy nidaog isip best pair sa latin junior, samtang sila si Christian Suelto ug Saharah Maga maoy mipatigbabaw sa youth category. –BANAT NEWS