Guadalupe, Buhisan mikubkob 2 ka golds

CEBU - Parehong mikabkab og duha ka bulawan ug usa ka silver ang barangay Guadalupe ug Buhisan aron saw-an ang unang dapit sa 12th leg sa Go Ching Hai-Martina-M. Lhuillier Dancesport and Hip-Hop Competition sa Brgy. San Nicolas dili pa dugay.

Ang Guadalupe miposte og 1-2 finish sa juvenile standard action pinaagi sa tandems nilang Jhameille Theresa Basanez/Paulo Usman ug Glaren Roi Saldua/Naditha Manubag.

Nadaog nilang Saldua ug Manubag ang gold pinaagi sa pagdominar sa latin event.

Sa laing bahin, ang Buhisan, naka-gold sab gikan sa juvenile latin dancers nga sila si Rane Orquia ug Juvelyn Tuling ug junior standouts Jackilyn Fuentes ug Jimmy Jabonero.

Ang 11 leg host Pasil nahimutang sa ikatulong dapit human mihakot og usa ka bulawan ug usa ka silver.

Ang gold nakuha nilang Mark Orcullo ug Christine Abellana sa standard discipline.

Mi-okupar sa ikatulong dapit ang Lahug nga miligwat og usa ka gold ug tulo ka bronzes luyo sa paningkamot nilang Darryl Palalon ug Audrey Codera.

Mitapos sa ikalima mao ang Mambaling nga mihakot og usa ka gold kortesiya nilang Jason Milla ug Katheren Paliro sa junior latin ug usa ka bronze.

Sa open action, ang Cogon Pardo mikubkob og usa ka silver ug usa sab ka bronze, ang host San Nicolas adunay usa ka silver ug ang Labangon ug Cogon Ramos miani og usa ka bronze matag usa.   (BANAT NEWS)