Pajo midagit na gyud og korona

Cebu - Sa katapusan, human sa tulo ka tuig nga pangindahay, ang Pajo National High School (PNHS) midaog na gyud kampiyonato pinaagi sa pagpukan sa University of Southern Philippine Foundation (USPF).

Ang PNHS ni Fr. T. Manayon mipukan sa USPF sud sa upat ka sets, 25-17, 25-20, 14-25 g 25-21 didto sa USPF gym niadtong Sabado nga nakapakgang sa laraw sa naulahi pagdaog og grandslam title.

Gumikan sa maong kadaugan, ang Pajo maoy morepresentar sa Sugbu sa Shakey’s Volleyball League for Girls National Finals karong Abril 14-18 didto sa Bacolod City.

Nanginit dayon ang Pajo sa unang duha ka sets kortesiya ni tournament MVP Methosheena Bate, Athena Sucalit, Catherine Marquez, Mary Jane Cortes, Cristy Sucalit ug Lovely Marie Murillo.

Apan ang USPF mibawos sa ikatulong set luyo sa paninguha ni team captain Dianne Navaja, Cyd Demecillo, Jessah Nacorda, Jinky Garidos, Kaisse delos Santos ug sa managsuong Rexamy ug Louise Gabriel.

Padayong nanginit ang USPF sa ikaupat nga set ug miabante og tres puntos, 16-13. Apan ang Pajo mihipos og pito ka sunod-sunod nga puntos kortesiya nilang Lovely Marie Murillo aron pag-ilog og balik sa labaw, 20-16.

Ang USPF misuway og ilog sa labaw, apan wala kini makasustiner tungod kay daghan sila'g usik nga nahimo ilabi na sa serbisyo sa fourth set.

Kasagaran sa mga magduduwa sa Pajo naggikan sa ilang kadaugan sa bag-o lang natapos nga Governor Gwen Garcia Unity Volleyball Cup for Women (GUV) Cup.

Sa laing bahin, ang Abellana National High School (ANHS) maoy miangkon sa ikatulong dapit human gipilde ang Don Gerardo Ouano Memorial National High School (DMNHS), 23-25, 25-9, 25-13.

Gawas ni Bate isip MVP, lain pang mga magduduwa gikan sa Pajo ang naapil sa Mythical Six nga naglakip ni Lovely Marie Murillo (best server) ug Athena Sucalit (best receiver).

Mga magduduwa sa USPF nga naapil sa selection mao sila si Dianne Navaja (best attacker), Jessah Nacorda (best setter), Cyd Demecillo (best blocker) ug Louise Gabriel (best libero).

Ang 4th Shakey’s Girls Volleyball League gipaluyohan sa Shakey’s, Philippine Sports Commssion, Asics, Dunkin Donuts, Petron, Toby’s ug Nature’s Spring. -  BANAT NEWS