Pacquiao-Hatton showdown dili madayon

Cebu - Dili na gyud madayon ug nahanaw na sa mapa ang gikatakdang super fight tali ni pound-for-pound king Manny 'Pacman' Pacquiao ug Briton champ Ricky 'Hitman' Hatton tungod sa daghang mga kakulian ug kontrobersiya.

Ang Pacquiao-Hatton showdown gikatakda unta karong Mayo 2 didto sa Las Vegas, Nevada.

Gumikan sa pakyas nga panagsabot sa duha ka kampo kalabot sa bahin sa kita sa ilang away, hingpit nang gibuhian sa isig ka habig ang kontrata alang sa gikaintapan unta nga sangka sa duha ka mga sikat nga boksidor sa tibuok kalibotan.

Si Richard Schaefer, chief executive sa Golden Boy Promotions, nagkanayon atol sa interview sa ESPN nga nakahukom na sila nga dili idayon ang away tungod kay napakyas ang kampo ni Pacquiao pagpirma sa kontrata niadtong Miyerkules nga maoy deadline aron mahikay ang away.

Matud pa ni Schaefer nga dili sila mahimong mosunod sa gusto sa pikas kampo ug mangita na lang og laing kontra alang ni Hatton.

Ang promoter ni Pacquiao nga si Bob Arum sa Top Rank Inc. miasoy nga buot sa Filipino ring superstar nga mas daku ang ilang share kay sa 50-50 nga giduso sa kampo ni Hatton.

Buot ni Pacquiao ang 60-40 share, apan gisupak kini sa Golden Boy Promotions tungod kay giingong adunay nahitabong "verbal agreement" niadtong Disyembre 2008.

Si Hatton, kinsa nagkupot 45-1, 32KOs, naglaraw karong moharong ni Oscar De la Hoya o dili ba sa modaog sa Juan Manuel Marquez-Juan Diaz bout.

Sama ni Pacquiao, gusto usab nga hagiton ni Hatton sa usa ka rematch ang miretirong boxing legend Floyd Mayweather Jr.

Sa iyang bahin, si Pacquiao nga nagtangag og 48-3, 36KOs, posibleng moatubang ni Humberto Soto, apan ubos kini og kita itandi sa 10-12 milyones dolyares nga iyang mabulsa sa 50-50 split ni Hatton. – BANAT NEWS