Cebu - Sa dili pa nako sugdan og tagik ang mga kalihukan kalabot sa ikatulong season sa Cebu Schools Athletic Federation, Inc. (CESAFI) Partner’s Cup, akong unahon paghisgot kining usa ka balay dalangpanan o "shelter" sa mga dinaogdaog ug gipang-abusohan nga kabus natong kaigsuonan nga gitawag og My Bonita Home for Girls nga anaa mahimutang sa Phase 3 San Jose, Talamban, ning dakbayan sa Sugbu.
Gidumala kini sa Franciscan Sisters of the Sacred Hearts ubos nila ni Superior Juliet Pregido, SFSc ug Sister Mariz Renconada, SFSc.
Akong gi-awhag ang mga tubig-tubigan ug ingnon na lang nato pagsulti nga mga adunahan sa pagpaambit sa ilang grasya pinaagi sa paghatag og donasyon ngadto sa My Bonita kay daku kaayo kini’g ikatabang sa ilang kawsa. Ang maong balay dangpanan maoy nagsagop karon sa mga batang babaye kinsa nag-edad og 18 anyos paubos nga gipang-abusohan ug gipanglugos sa ilang mga amahan ug ama-ama, mga batang ilo na sa ginikanan o “ilong tuwapos” o mga biniyaan gikan sa nagkalain-laing dapit sa Sugbu.
Aduna didto’y 13 anyos nga gipamabdosan sa iyang ama-ama ug ang uban kanila mga single parents. Laktod pagka sulti, makaluluoy ilang kahimtang didto.
Mahimong moduaw kamo didto ug motawag sa telepono 5162405.
Ako kining gitagad kay dugay-dugay na kining gihangyo nako ni Sister Renconada ug akong nabatyagan nga angayan gyud kining tabangan ang maong grupo sa mga madre.
Nagkita kami ni Sister Renconada niadtong Disyembre 22 sa buntag sa Cebu City Sports Center atol sa paglusad ni Fr. Vic Uy, SVD sa iyang Community Outreach Games ug akong giisip nga swerte ako niadtong adlawa tungod kay madre ug usa ka pari ang akong naka-kukabildo. Si Fr. Vic, usa sab ka commissioner sa Philippine Sports Commission (PSC) ug ang iyang pagka-pari maoy usa ka lig-on nga birtud kun nganong angayan siyang mahimong tsirman sa PSC.
Tiaw mo wala ako sa simbahan, sa kumbento o sa seminaryo, apan pari ug madre ang akong gika-estorya. Usahay gani kun moadto ka’g simbahan, dili man gani gyud nimo ikasulti ang mga pari tungod sab sa ka-apike sa ilang mga iskedyul.
* * *
Sugdan na karong umaabot Sabado, Enero 24 ang gikahinaman nga CESAFI Partner’s Cup diin ang walo ka mga sakop sa CESAFI gipang-angkon o gipaluyohan og mga corporate sponsors isip ilang mga partners. Mao nga gitawag kini’g Partner’s Cup kay kun walay partners, mag-unsa man ang mga CESAFI teams?
Ang mga teams mao ang defending champion University of the Visayas (UV) Lancers nga gipaluyohan sa Prime Asia Lending, ang University of San Jose-Recoletos (USJ-R) Jaguars nga gisagop karon sa Ave Maria Sanctuary Park, ang Southwestern University (SWU) Cobras nagdala sa ngalan nga Hotel Fortuna, ang University of Cebu (UC) Webmasters giila na nga Alaska Milk, ang University of San Carlos (USC) Warriors gipaluyohan sa Aerosol Lion Tiger, ang University of Southern Philippines (USP) Panthers mao nay gipaluyohan sa CDO-DOL Cheesedog, ang Don Bosco Technology Center (DBTC) Greywolves sagupon sa R. Lapid’s Chicharon ug ang Cebu Institute of Technology (CIT) Wildcats paluyohan sa Unilab.
Dili lang kay sa duwang basketball misuporta kining atong mga higalang kompaniya, mi-angkon sab sila’g mga volleyball ug football teams nga mao sab gihapon nga teams nga ato nang gibutyag sa unahan.
Ang Partner's Cup anha pagahimuon sa Cebu Coliseum hangtod sa buwan sa Marso diin ibalik na sab ang best-of-five finals. Sama sa gipaabot, ang UV lang gihapon maoy moguwang kampiyon ug ang pangutana na lang nga wala pay hustong tubag kun kinsay ilang maka-atbang atol sa kampiyonato.
* * *
Matud pa ni commissioner Ramon “El Presidente” Fernandez nga karong tuiga, mosuroy ang Partner’s Cup ngadto sa mga kalungsoran aron mas mailhan ang liga ug mas makakuha kini’g dugang publicity mileage aron sa maong paagi mosamot kailado ang mga players nga natungha karon sa kolehiyo.
Angay sab natong daygon ang mga nagpaluyo niining Partner’s Cup gawas sa mga team owners ug managers, school presidents ug coaches ug lakip na nila ni CESAFI commissioner Felix O. Tiukinhoy, Jr. ug Atty. Baldomero C. Estenzo.
Gipahinunduman ang mga coaches, assistant coaches ug mga referees nga adunay ipahigayon nga seminar alang sa mga bag-ong rules sa FIBA nga pagadumalaon ni international referee Romy Guevarra, ang chief referee sa PBA.
* * *
SG Miscellaneous. Before I forgot to mention in this corner last week our fiesta in Poro,Camotes last Thursday and Friday, January 16-17 in honor of patron saint Senyor Sto. Niño. Happy fiesta to all my paisanos. Yesterday was the turn for Cebu City to celebrate its fiesta highlighted with the annual Sinulog grand parade. Pit Senyor. - BANAT NEWS