CEBU - Nagpanikad na ang mga riders dinhi sa Sugbu ug sa kaulohan nga mopakita sa ilang abilidad sa 2009 MS Motosuit Motocross Series nga mosikad karong Domingo diha sa Sitio Tuburan, Jubay, Lilo-an.
Ang opening leg pagaulohan og “8th Barangay Captain Manuel Wagas Motocross Cup” diin ang amahan sa barangay mao mismo ang mopasiugda.
Sama sa nangaging mga lumba, ang Wagas Cup gipahigayon sa panahon sa Sinulog grand mardi gras.
Ang ikaupat nga edisyon ning tinuig nga lumba gipaluyohan sab sa Castrol Philippines.
Bisan pa sa Sinulog, ang loyal supporters sa motocross maghugop aron mosaksi sa makapaukyab nga aksiyon.
Human sa aksiyon karong Domingo, ang riders motaak sa Daanbantayan karong Enero 25. Ang lumba pagaulohan og “Agujo Motocross Challenge” nga pagadumalaon ni Malou Pepito.
Ang 2009 MS Motosuit Motocross Series adunay 12 legs uban sa mga benefactors sa miaging tuig nga mipadayag nga mo-host pag-usab. Kini mao ang Oriental Negros, Carcar, Consolacion ug San Remigio, nga misaad nga mopahigayon og duha ka legs sa town proper ug sa Calambua. (BANAT NEWS)