CEBU - Mipakita og tilimad-on si Paco Rodriguez pagsugod sa 2009 pinaagi sa paghari sa opening leg sa Kartzone Kart Series ubos sa pagdumala sa Cebu Auto and Racing Show (CARS) niadtong Domingo didto sa Park Mall sa Mandaue reclamation area.
Si Rodriguez, ang kanhi "Karter of the Year" awardee unang mitadlas sa finish line ning 30-lap action aron pagsakmit sa korona sa experts division.
Ang batan-ong si Jette Calderon mitapos sa ikaduha, gisundan ni Patrick Gandionco.
Sa masters division, si Lord Seno maoy misakiyo sa korona, nagsunod niini si Reiner Englis uban ni Reggie Hisoler, kinsa mipahiluna sa ikatulo nga dapit.
Gawas sa karting, ang pre-Sinulog event nga gipasiugdahan sa HAIGE Marketing naglatid sab sa sound off, car show ug autocross.