Cebu - Gipadayag ni Manny 'Pacman' Pacquiao nga naglaraw siyang moduwa uban sa iyang koponan GenSan MP Warriors sa umaabot nga Smart Liga Pilipinas Conference II.
Sumala pa sa mga kadagkoan sa liga nga ang world best pound-for-pound fighter interesado moapil sa line-up sa iyang koponan.
Ang CEO sa Liga Pilipinas nga si Noli Eala nagkanayon nga wala pa malakip si Pacman sa official line-up sa GenSan apan gikonpirmar na ni Pacquiao ang iyang pagsalmot dihang nitawag kini kaniya sa telepono.
Ang manghod ni Pacquiao nga si Bobby maoy nalakip sa 16-man roster sa GenSan team.
Matud pa sab ni Eala nga si Pacquiao gilaumang motambong sa opening sa Liga karong Enero 14 didto sa General Santos City. Sa nasayran ang GenSan ni Pacquiao mao ang usa sa duha ka mga bag-ong koponan nga nisalmot sa liga.
Gibutyag sab ni Eala nga daan nang mipahibalo si Pacquiao sa iyang pagsalmot sa liga sa dihang nangandam pa kini alang sa iyang away batok ni Oscar De la Hoya. – BANAT NEWS