"BIG CHALLENGE 4" sa Bogo karong Enero 24

CEBU - Mahitabo na ang init nga binakbakay sa gikaintapang “PATID SUKMAG- Big Challenge 4” nga salmutan sa mga inila ug banggitang fighter dinhi sa Visayas ug Mindanao   karong Enero 24, sa alas-3:00 sa hapon didto sa Lapaz Basketball Court, Bogo, Cebu.

Sa main event, mag-abot ang dalan sa Muaythai ug Kick Boxing Champion nga si Anecito “Dondon” Gesta batok ni Romelo Espra sa ARCOMJUKAI Mandaue sa usa five rounder match.

Ang two-time Big Challenge Champion nga si Emel Larubis Jr. makigharung usab ni Leo Peñafiel sa Paknaan, Mandaue City sa supporting main event. Si Vicvic Gesta nga taga-Cayang, Bogo makighamag ni Hector Pescalla kinsa usa ka kanhi Cebu Champion.

Sa boxing bout, magsangka sa upat ka hugna sa away sila si Renante Boctot sa Cebu City kontra Leonardo Nicanor sa Talisay City. Ang produkto sa G-Anime Fighter nga si Jover Gonzaga makigsumbagay ni Romelo Lopez kinsa usa ka black belter sa COMJUKAI/MATCOM sa Mindanao.

Mokumpleto sa away sa mixed fight mao ang URCC qualifier fighter nga si Jay-R dela Torre batok ni Junrey Soquite sa Durex Dragon, samtang si Eric Areglado kontra Richard Gojo ug Jonamar Macaraya nga moatubang ni Gilmar Avila.

Ang maong fight event gipasiugdahan ni Anecito “Cito” Gesta Sr. ang founder ug director sa Cito’s Martial Arts Club-Pro Kwon Bub Association of Korea and Philippines (CMAC-PKB) Mandaue City lakip na sa Kickboxing Association of the Philippines- International Amateur Muay Thai Federation (KAP-IAMTF Thailand) ug International Kick Boxing Federation (IKBF Germany) uban sa abag ni Barangay Kapitan Marlou T. Ancajas ug Lapaz Barangay Council. (Lemuel P. Maglinte)   (BANAT NEWS)