CEBU - Nag-una karong kandidato sa “Best Player of the Conference” award ang sinaligang gwardiya sa Talk N’ Text Tropang Texters nga si Mark Cardona alang sa nagkainit nga season sa KFC-PBA Philippine Cup.
Gawas ni Cardona, ang Fil-American nga si Kelly Williams sa Sta.Lucia Realtors mipakita usab og nindot nga labuk aron mulangkat sa maong pasidungog. Ang sentro sa Coca Cola Tigers nga si Asi Taulava, Willie Miller sa Alaska Aces mao usab ang mga players nga posibling koronahan isip Best Player karon nga conference.
Si Cardona kinsa mao usab ang Best Player of the Conference niadtong 2007 Fiesta Conference nag-average og 23.8 puntos karon nga season, ang 6-foot-2 nga gwardiya adunay 602 SPs (statistical points) mao ang nahimong bayani karon sa Texters nga nipwesto na karon sa semi-finals.
Nagsunod ni Cardona mao ang tulo ka kanhi MVP sa PBA nga sila si Williams (33.2 SPs), Taulava (32.5 SPs), ug Miller (32.0 SPs).
Mokumpleto sa Magic Five alang sa maong award mao si Ranidel De Ocampo kinsa bag-o palang nibalhin sa Texters gikan sa Air21 Express pinaagi sa iyang 31.4 SPs.
Ang resulta sa maong award magagikan sa four-man special committee sa PBA, mga sakop sa media ug sa mga players, isangyaw ang nigawas nga mananaug sa Best Player of the Conference award atol sa Game Four sa best-of-seven series sa Finals. (Lemuel P. Maglinte) (BANAT NEWS)