CEBU - Pila na lang ka buwan sa wala pa matapos ang tuig 2008, nakuha ni Rafael Nadal sa Spain ang no. 1 world ranking sa men’s division sa natad sa tennis pinaagi sa iyang kinatibuk-ang 6,677 puntos suma pa sa Association of Tennis Professionals kon ATP.
Si Nadal mipuhal kang Roger Federer sa Switzerland nga taudtaud gyung naghupot sa unang pwesto ug karon midailos na sa no.2 sa iyang nahakot nga 5,305 puntos.
Ang nahimutang sa no.3 mao si Novak Djokovic sa Serbia sa iyang 5295 puntos, ang ika-upat mao si Andy Murray sa Great Britain kinsa nakatigum og 3, 720 puntos, ang ikalima mao si Nikolay Davydenko sa Russia sa iyang 2,715 puntos, ang ika-unom si Jo-Wilfred Tsonga sa France kinsa may 2,050 puntos, ang ika-unom mao si Gillens Simon sa France nga may 1,980 puntos, ang ika-pito si Andy Roddick sa Estados Unidos kinsa may 1,970 puntos, ang ikawalo si Juan Martin del Potro sa Argentina sa iyang 1,945 puntos ug ang ikanapulo mao si James Blake sa Estados Unidos sa iyang 1,775 puntos.
Sa mga women’s tennis players, ang no. 1 sa listahan sa Women’s Tennis Association mao si Jelena Jankovic sa Serbia kinsa mihagdaw og 4,710 puntos.
Ang ikaduha mao si Serena Williams sa Estados Unidos (3,888), ikatulo si Dinara Safina sa Russia (3,817), ika-upat si Elene Dementieva sa Russia (3,663), ikalima si Ana Ivanovic sa Serbia (3,457), ang ika-unom si Venus Williams sa Estados Unidos (3,272), ang ikapito si Vera Zvonareva (sa Russia (2,952) ang ikawalo si Svetlana Kuznetsova sa Russia (2,726) ang ikasiyam si Maria Sharapova sa Russia (2,515) ug ang ikanapu mao si Agnieszka Radwanska sa Poland (2,286).
Ang pinaka maayo sa men’s doubles mao sila si Bob Bryan ug Mike Bryan sa Estados Unidos ug ang labing maayo sa women’s doubles mao sila si Cara Black sa Zimbabwe ug si Liezel Huber sa South Africa. (Gabby G. Malagar) (BANAT NEWS)