CEBU - Mipahibalo ang commissioner sa Cebu Schools Athletic Foundation, Inc. (CESAFI) nga si Felix O. Tiukinhoy, Jr. nga ilang i-uswag ang pagpahigayon sa CESAFI Partner’s Cup tungod kay mibakasyon pa ang mga players ug aron sab pagtamud sa kasaulogan sa umaabot nga Sinulog fiesta unya sa Enero 18, 2009.
Matud pa ni Tiukinhoy nga iya nang gipahibalo si Partner’s Cup commissioner Ramon Fernandez ug ang mga coaches sa nagkalain-laing teams nga mosalmot sa nahisgotang torneyo kalabot sa maong kausaban.
Ang Partner’s Cup sugdan unta karong Enero 10 sa sunod tuig apan ila kining gi-uswag ngadto na sa Enero 24 diha gihapon sa Cebu Coliseum.
Si Tiukinhoy nagkanayon nga sa kasamtangan, ila pang sabotan kung unsa gyud ang opisyal nga mga corporate sponsors nga maoy gamiton sa mga unibersidad ug kolehiyo atol unya sa ilang meeting.
Matud pa ni Tiukinhoy, iya na sang gipahibalo ang mga coaches nga sila si Elmer “Boy" Cabahug of the University of the Visayas nga maoy defending champion ubos sa CDO Hamburger, Edito Salacut sa University of San Jose Recoletos, Jay Ramirez sa University of San Carlos, Roel Gomez sa University of Cebu, Alejandrito “Dodie” Miego sa Southwestern University, Rudy Enterina sa Don Bosco Technology Center, Raul Latonio Sr. sa University of Southern Philippines-Foundation ug si Alex dela Torre sa Cebu Institute of Technology.
Ang torneyo nga molanat hangtod ngadto sa Marso 28, pagaduwa-on lang matag Sabado ug Domingo diha sa Cebu Coliseum, matud pa ni Tiukinhoy. (BANAT NEWS)