Landero bag-ong PBF straw weight champion

CEBU – Usa ka makusug nga kinumo ang gipatugpa ni Michael Landero ngadto ni Ruel Lagunero hinungdan sa pagkapukan niini, si Landero misakmit sa Philippine Boxing Federation Straw o minimum weight title sa ilang engkwentro niadtong miaging adlaw didto sa Mandaluyong Gym, Mandaluyong City.

Sa tanang away, ang panagtagbo ni Landero ug Lagunero mao ang pinakangilngig nga aksyon diin gipakita sa duha ang tinuod nga bulok sa duwa.

Gipaboran ni Judge Romy Yulo si Lagunero pinaagi sa paghatag og 97-94 nga iskor apan gisalbar sa nahabiling duha ka hurado si Landero. Si Antonio Valenzuela mitunol sa 98-91 nga iskor pabor kang Landero samtang si Ricardo Canlas mihatag og 96-94 tungod usab sa impresibong dinuwaan nga gipakita niini.

Ang unang bahin sa engkwentro gidomenar ni Lagunero dihang miburak kini sa iyang solidong kinumo dungan ang pag-angkon sa unang duha ka hugna apan atol sa ikatulong round sa kumbati gigamit ni Landero ang iyang height and reach advantage hinungdan nga naglisud og sagang si Lagunero hangtod nga nahuman ang away.

Tungod sa maong kadaugan, si Landero mikatkat ngadto sa 8-4-3 win-loss-draw record samtang si Lagunero midailos ngadto sa 8-3-2 nga baraha. Sa laing away, midaug si undefeated bantamweight Rene Bestudio (6-0, 1 KO) batok ni Roel Cuizon (3-2-2, 1 KO) samtang sa junior flyweight si Eljune Leonardo (6-1, 1 KO) mikulata ni Dino Lelis (4-3-1, 1 KO). Sa junior flyweight bout, nagmalampuson usab si Quilver Cailing pagkutlo sa titulo dihang midaug kini batok ni Joe Galamiton pinaagi sa eight-round unanimous decision. (Arnie P. Atuel) (BANAT NEWS)