Bazooka mo-away karong Enero 31
CEBU – Human sa mapait niyang kapildehan batok ni Rafael Concepcion, andam na ang Sugbuanong si AJ “Bazooka” Banal nga mokatkat pagbalik sa ring dihang iyang atubangon ang Indonesian super flyweight champion Nouldy Manakane karong Enero 31 didto sa Tagbilaran City, Bohol.
Si ALA Gym boxing patron Tony Aldeguer mitug-an atol sa interview sa www.insidesports.ph, nga tungod sa sakit niyang kapildehan sa mga kamot ni Concepcion nga maoy hinungdan sa pagkawagtang sa iyang WBA Interim title, nagpanikad karon si Banal nga mo-away pag-usab karon nga nitungtung na siya sa hingkud nga edad.
Ang Founding secretary general sa WBC nga si Rudy Salud mitug-an nga dako pa gihapon siya og pagsalig sa abilidad ni Banal bisan pa sa iyang kapakyasan ug nagtuo pa gihapon siya nga makab-ot ra niini ang world title.
Samtang si Aldeguer sa iyang bahin naglaom nga magmalampuson si Banal sa pagpukan sa Indonesian Champion nga adunay rekord nga 17-7-1 kinsa midaug sa unom niini ka sunod-sunod nga away.
Naangkon ni Manake ang Indonesian 115 pound title pinaagi sa unanimous decision batok ni Jimmy Gobel niadtong Marso sa milabay’ng tuig ug miposte’g split decision batok ni Marangin Marbin sa usa ka title defense niadtong Mayo 2008. Sa katapusan niining away, si Manake miiskor og usa ka seventh round TKO batok ni Muhadin Crusher.
Ang 20-anyos nga si Banal nagtangag karon sa rekord nga 17-1-1, apan bisan pa kun napakyas kini batok ni Concepcion gikonsiderar gihapon siya nga usa sa mga dekalibreng Pinoy boxer.
Si Banal nahimutang karon sa rank No.8 sa International Boxing Federation (IBF) ug nipahiluna sa rank No. 10 sa World Boxing Association (WBA). (Arnie P. Atuel) (BANAT NEWS)
- Latest
- Trending
