Queen Elizabeth ni Pacquiao, isinilang na

Inagawan ni Manny Pacquiao ng mga world boxing titles sina Mexican Juan Manuel Marquez at Mexican-American David Diaz at umiskor ng isang eight-round TKO kay world six-division titlist Oscar Dela Hoya.

Matapos nito, isang malusog na baby girl naman ang isinilang kamakalawa ng gabi ng asawa niyang si Jinky sa Los Angeles Metropolitan Hospital sa Los Angeles, California.

“Nagpapasalamat ako sa Panginoon at naging maayos ‘yung pagsisilang ni Jinky kay baby Queen Elizabeth,” sambit ng 30-anyos na si Pacquiao para sa kanilang pang apat na anak ni Jinky matapos sina Michael Stephens, Emmanuel, Jr. at Mary Divine Princess.

Si baby Queen Elizabeth ay isinilang ganap na alas-6:37 ng gabi at tumimbang  ng 7.9 pounds, dagdag ng Filipino boxing superstar.

Nasa loob ng delivery room si “Pacman” at personal na pumutol sa umbilical cord ni baby Queen Elizabeth.

Magbabalik sa Pilipinas ang pamilya ni Pacquiao sa unang linggo ng Enero para ayusin ang birth certificate ni baby Queen Elizabeth na itinuturing na isang US citizen by birth. (Russell Cadayona)