CEBU – Nanghawud ang mga taga-Mindanao nga sila si Critfrankreadel Indapan ug Mary Grace de los Santos sa gatusan ka mga karerista nga nisalmut sa gipahigayong 1st Talisay City Run kagahapon sa buntag didto sa Talisay City Hall.
Si Indapan nitapos sa 10-kilometer run sulod sa 32 minutos ug 59.64 segundos aron pangulohan ang men’s open category. Nagsunod ni Indapan mao si Mendel Lopez sa Negros Oriental sa iyang oras nga 33:42:76, samtang laing taga-Mindanao nga si Elmer Bartolo mipahiluna sa third place.
Sa laing bahin, ang Zamboangeña nga si Mary Grace de los Santos milampus sa pagkulit sa iyang ikatulong sunod-sunod nga kadaugan dihang siya ang nilangkat sa kampiyonato sa women’s division sulod sa 39 minutos ug 28.42 segundos, nisikit kaniya si Madelyn Carter kinsa nirehistro sa oras nga 40:36:58 alang sa second place.
Sa iyang bahin, ang banggiitang female runner nga si Lieszl Lumindas-Gitaruelas kinsa igo lang nipahiluna sa ikatulong dapit nagkanayon nga ang pagsalmut sa international long distance run ang iyang tumong karon.
Sa 5K division, sila si Philip Duenas ug Miscelle Gilbuena maoy nag-una sa maong tagsa-tagsa nila ka dibisyon.Si Duenas nangulo sa men’s bracket sa iyang oras nga 16:29.71 gisundan ni Joel Delposo sa iyang 16:35.32 ug Ian Bernido nga mikulit og 16:58.32.
Si Gilbuena maoy gikoronahang reyna sa women’s bracket sa iyang oras nga 20:43.55. Nagsunod si Vlessica Jagna sa ikaduhang pwesto sa iyang 21:18.69, samtang si Haziel Ritavale nilingkod sa ikatulong dapit sa iyang 22:14.82.
Ang 3K category gipangulohan ni Maria Carmela Quijano. Dexter Secong sa second place ug Seigfred Cañete alang sa third place. (BANAT NEWS)