Sunod away ni Pacquiao gitakda sa Mayo Heat gilamoy sa Grizzlies

Ang mas batan-ong pwersa sa Memphis Grizzlies maoy daku’g gikatabang alang sa ilang paglampaso sa Miami Heat pinaagi sa makabungog nga kadaugan sa iskor, 102-86 sa nagpadayong aksiyon sa National Basketball Association (NBA) didto sa FedEx Forum sa Memphis, Tennessee.

Walo sa 14 ka mga players sa Memphis ang nagpanuigon lang og 23 anyos paubos ug ilang gipahimuslan ang ilang kapaspas ug kakusog aron paglamoy sa nagkayong Heat ubos sa liderato ni Dwyane Wade.

Ang Heat maoy kampiyon sa NBA kaniadtong 2006.

Ang rookie nga si OJ Maoy maoy nangu sa Grizzlies pinaagi sa iyang 28 puntos ug gisundan siya ni Rudy Gay kinsa mitampo og 18 puntos.

Ang kadaugan maoy ika-upat nga sagunson alang sa nagsangki-ig nga Grizzlies kinsa naghupot na karon og 9-15 nga baraha ug dili kaayo layo kung itandi sa Heat nga aduna’y 12-11 nga baraha.

Mao sab kini ang pinakataas nga winning streak sa Grizzlies sukad sa 2005-2006 season.

Laing mga batan-on sa Grizzlies nga misalida kagahapon mao sila si Darco Milicic kinsa mihakot og season-high 13 puntos ug si Mike Conley mitampo og 12 puntos.

Si Michael Beasley maoy nangu sa Heat sa iyang 20 puntos, si Wade may 17 puntos ug si Joel Anthony may 12 puntos ug 13 ka rebounds nga maoy labing una niyang double-double karon nga season.

Didto sa Staples Center sa Los Angeles, California, ang host LA Lakers midaug batok sa mas huyang kaayo nga Minnesota Timberwolves sa iskor 98-86, nakasakmit sa sunod-sunod nga unom ka daug ang San Antonio Spurs apan nakasikit ang Oklahoma Thunder sa iskor, 109-104 ug ang New Orleans Hornets misumpo sa Toronto Raptors, 99-91.

Sila si Kobe Bryant ug Pau Gasol maoy nagkumboya alang sa Lakers pinaagi sa ilang 26 ug 18 puntos. Si Andrew Bynum ug Trovero Ariza parehong mi-iskor og 14 puntos samtang si Al Jefferson maoy nangu sa pilderong Wolves sa iyang 20 puntos ug si Craig Smith may 18 puntos.

Sila sab si David West ug James Posey maoy mibaswat sa Hornets didto sa Air Canada Center batok sa Raptors. Si West misumitir og 29 puntos ug si Posey may 20 puntos ug 10 ka rebounds samtang si Chris Bosh mibugha og 25 puntos alang sa Raptors, may 22 puntos si Jose Calderon ug may 19 puntos si Jermaine O’Neal.

Isip usa sa mga importanteng bisita sa pambansang kamao, moabot ang Top Rank Promotion Big boss Bob Arum karong adlawa alang sa birthday celebration ni Pacquiao ugma didto sa General Santos City Convention Center sa General Santos City.

Dili lang ang pagselebrar sa adlaw'ng natawhan sa Pinoy boxing champ ang tuyo sa Amerikanong promoter sa iyang pagtunga ugmang adlawa, nagkanayon ang suod nga higala ni Pacquiao nga si Wakee Salud nga usa sa mga tuyo ni Arum sa iyang pag-abot dinhi sa Pilipinas mao ang pagplano sa sunod away sa four-division world champion.

Matud pa usab ni Salud nga nadesisyonan ni Arum nga ang buwan sa Mayo sunod tuig maoy gusto niini nga mamahimong petsa sa sunod away ni Pacquiao. Gi-asoy usab ni Salud nga tulo ka boksidor karon ang giinitan ni Arum nga isabung sa Pinoy boxing sensation.

Lakip sa mga gipilian mao ang British champion Ricky Hatton, Zab Juddah ug kanhi pound-for-pound king Floyd Mayweather Jr. nga posibleng mahitabo sa Mayo 2 o 9 sa sunod tuig.

Sa pagkakaron, gusto pa ni Pacquiao nga mopahuway human niya gipukan si De la Hoya, usa na niini ang pagsaulog niya sa iyang adlaw'ng natawhan ugma diin imbitado ang mga sikat nga personalidad sa politika ug showbiz.

Si presidente Gloria Macapagal Arroyo maoy guest of honor ugmang adlawa, lakip usab sa mga giimbitar ni Pacquiao mao ang kanhi niya mga kontra nga sila si Marco Antonio Barrera, David Diaz, Juan Manuel Marquez ug Erik Morales, dili makatunga ang katapusan niyang biktima nga si Oscar De la Hoya kinsa nilarga ngadto sa Puerto Rico uban ang iyang pamilya.

Human sa iyang birthday, si Pacquiao mobisita didto sa Bukidnon alang sa usa ka family reunion una pa siya mulupad karong Disyembre 21 o 23 paingun ngadto sa Los Angeles aron kuyugan ang iyang kapikas nga manganak na karong buwana. (Lemuel P. Maglinte)