Cebu - Gikoronahan isip hari ug reyna sila si John Philip Duenas ug Lizsl Lumindas-Gitaruelas human sila mangharus sa gipahigayon nga 7th Cebu Midnight Run kagahapon didto sa Cebu Business Park.
Ang garbo sa Southwestern University (SWU) nga si Duenas mipalagpot ni Mendel Lopez kinsa mao ang nanghawod sa unang lima ka kilometro sa lumba, ang lumad nga taga- Danao nga si Duenas kalit lang mi-overtake ni Mendel sa katapusang 100 meters sa lumba.
Gikan didto wala na molingi pa si Duenas og hingpit nang gisakmit ang kampiyonato,si Duenas usab ang nahimong kampiyon sa UTAFA Hurdle-to-Run niadtong miaging semana.
Si Ian Bernido maoy nipahiluna sa ikatulong dapit, gisundan ni Eugene Delposo nga milingkod sa ikaupat nga dapit ug Ramie Lawas maoy fifth placer.
Sa iyang bahin, ang banggiitang runner nga si Gitaruelas milampos usab sa pagsakmit sa titulo sa womens division.
Si Gitaruelas gisundan sa higpit niyang kaatbang nga si Madelyn Carter ug Jessica Hermansson nga mitapos sa lumba sa ikatulong dapit. - Lemuel P. Maglinte (BANAT NEWS)