CEBU - Mikulit og laing daog ang Firstank ug Crao human gipilde ang ilang tagsa-tagsa ka karibal sa Allied Bank Basketball League Christmas Cup didto sa Our Lady of Sacred Heart Parish Gym sa dalan Escario, ning siyudad.
Ang Firstank mipukan sa Glorious Auto Supply, 50-45, samtang ang Crao naka-eskapo sa undermanned Granite Industrial Corporation sa iskor nga 57-55.
Si Henry Mancera maoy topscorer alang sa Firstank nga mikandos og 14 puntos, samtang si Kenneth Tee mao sab ang nangulo sa pilderong Glorious Auto Supply sa iyang 16 puntos.
Ang upat ka teams mag-abot pag-usab karong Domingo sa double knockout nga kumbati diin ang mga mananaog maoy magsangka sa tinaktakay nga kampiyonato. (BANAT NEWS)