Nalusutan ng Hapee Toothpaste ang matinding hamon na ibinigay ng Pharex upang iposte ang come-from-behind 94-85 panalo sa 2009 PBL PG Flex Linoleum Cup sa Ynares Sports Arena sa Pasig kahapon.
Nakikinikinita na ng Generix ang kanilang unang panalo nang kanilang kunin ang 65-56 pangunguna patungo sa huling 10-minuto ng labanan.
Ngunit bigla na lamang kumulapso ang Pharex at humakot ng 25-sunod na puntos ang Complete Protectors upang tuluyang makalayo at iposte ang kanilang ikatlong panalo sa walong laro.
Nagbida sina Jervy Cruz, Josh Vanlandingham at Ely Olarte sa naturang atake ng Hapee sa pagkamada ng 25 mula sa 38 point production ng team para sa kanilang pagbangon.
Sa ikalawang laro, nagpakatatag ang Magnolia Purewater sa ikalawang puwesto makaraang itala ang 91-79 panalo laban sa Burger King. (Mae Balbuena)