Pacquiao modaog

CEBU - Usa sa mga haligi sa paugnat sa kusog sa nasud nga si Jonathan ‘Atan’ L. Guardo, nagtuo nga ang Filipino   boxing superstar nga si Manny ‘Pacman’ Pacquiao, mokulit og kasaysayan sa iyang umaabot nga away batok ni US boxing legend Oscar ‘Golden Boy’ De la Hoya karong Disyembre 6 (petsa 7 sa Pilipinas) didto sa MGM Grand Hotel and Casino sa Las Vegas, Nevada.

“I think he (Pacquiao) has superior strength and speed to overwhelm De la Hoya. I think this fight is one between a boxer on his way up and gaining momentum and a boxer who is in the twilight of his career,” matud pa ni Guardo, ang two-time Sportsman of the Year awardee sa Sportswriters Association of Cebu (SAC).

Sila si Pacquiao ug De la Hoya magsangka sud sa 12 ka hugna nga non-title showdown ubos sa 147 lbs diin ang mga mahiligon og boksing sa tibuok kalibutan ang nag-atang niini.

Si Pacquiao padayon karon sa iyang sobsob nga ensayo didto sa Wild Card Gym ubos sa pagdumala sa nabantog nga American trainer Freddie Roach, samtang si De la Hoya nagbansay sab sa Big Bear sa superbisyon ni legendary Nacho Beristain ug Hall of Famer Angelo Dundee.

“This is Manny’s time. His last few fights honed him well for this fight. He will do everything up his sleeves to win this fight,” matud ni Guardo, kinsa usa sab nga tigpaluyo og amateur ug professional boxing.

Gani si Guardo adunay six-fight contract ni IBF/IBO flyweight champion Nonito ‘The Filipino Flash’ Donaire Jr. isip official endorser sa Arthro, ang nabantog nga food supplement nga gigama sa Uniherb Philippines, usa sa nag-unang health companies sa nasud diin si Guardo maoy presidente. Ang uban pang mga produkto sa Uniherb mao ang Kidneycare, Heartvit, Diabet ug ang labing bag-o nga mao ang Eyeberry. – BANAT NEWS