Pacquiao, De la Hoya pulos nanganti

CEBU - Daku ang pagsalig ni Pinoy ring ‘Pacman’ Pacquiao nga modaog batok ni US boxing legend Oscar ‘Golden Boy’ De la Hoya.

Si Pacquiao padayon karon sa iyang sobsob nga ensayo didto sa Wild Card Gym agi’g pagpangandam alang sa umaabot niyang away ni De la Hoya karong Disyembre 7 (oras dinhi sa Pilipinas didto sa MGM Grand Hotel and Casino sa Las Vegas, Nevada.

 Matud pa ni Pacquiao nga aduna na sila'y gipreparar nga mga “strategies” ug aduna na kini giandam nga pang-alkontra   sa unsa man nga mga taktika nga buhian ni De la Hoya

Gani ang trainer ni Pacquiao nga si Freddie Roach, nanganti nga tumbahon sa iyang batos si De la Hoya sa ikasiyam nga round.

Sa laing bahin, misaad sab ang kampo sa Golden Boy nga dili paabton si Pacquiao sa gikatakda nilang 12 ka hugna nga binukbukay ibabaw sa ring.

Laktod pagka sulti, nga tumbahon sab ni De la Hoya si Pacquiao sa dili pa ang 12 ka hugna.

 Mao kini ang labing dakung away ni Pacquiao, kinsa unang niaway ubos sa 106 pounds ug karon moaway sa welterweight division (147 pounds).

Samtang si De la Hoya, kinsa adunay height advantage, nakaaway sa 160 pounds, apan ninaog sa 145 pounds.

Si De la Hoya gipaubos gihapon sa iyang hugtanong pagbansay didto sa Big Bear retreat sa kabukiran sa California.

Si De la Hoya nakaabot   na sa 147-pound limit, samtang si Pacquiao kinahanglan pa nga mokuha sa maong timbang aron matuman ang gitawag nga “Dream Match.”

Si Pacquiao, kinsa nagpakita og gilas atol sa media workout didto sa Los Angeles kagahapon, kasamtangan karong nagbitbit og 47-3-2, 35KOs, samtang si De la Hoya nagbitbit og 39-5, 30KOs. – BANAT NEWS