USC, FEU midaog, abante sa PCCL Sweet 16

CEBU - Ang Cebu Schools Athletic Foundation, Inc. (CESAFI) third placer  University of San Carlos (USC) Warriors ug ang Far Eastern University (FEU) Tamaraws sa UAAP mi-abante ngadto sa Philippine Collegiate

Champions League (PCCL) Sweet 16 human gipilde ang managlahing karibal sa PCCL Cagayan de Oro Zonals niadtong miaging adlaw didto sa Xavier University gym.

Ang Warriors kinsa maoy midaog sa ikatulong puwesto sa miaging 8th CESAFI season batok sa University of Cebu (UC) Webmasters, naka-ipsot sa host Xavier University, 69-66, samtang ang Tamaraws yano kaayong midaog batok sa Capitol University.

Ang Warriors maoy ikatulong representante gikan sa Sugbu ngadto sa tinuig nga PCCL uban sa CESAFI defending champion University of the Visayas (UV) Green Lancers ug Ormoc leg winner University of San Jose-Recoletos (USJ-R) Jaguars.

Ang coaching staff sa USC nga si Ryan Betia nagkanayon nga napukan sila sa ilang unang duwa batok sa Capitol University, 84-87, apan nakabawi pinaagi sa pagmasaker sa University of Mindanao sa Davao City, 81-51.

Tulo ka Warriors ang mikulit og double figures nga gipangulohan ni Giovanni Padillo sa iyang 17 puntos. Si Joven Cid Cortes mipabuto og 13 puntos ug si Jordan Hermosa miposa og 11 puntos.

 Dili sayon ang kampanya sa Warriors sa Sweet 16 tungod kay ang una nilang makontra mao man ang UAAP losing finalist De La Salle University (DLSU) Green Archers. Ang Tamaraws mosugod sa ilang kampanya batok sa NCAA runner-up Jose Rizal University (JRU) Heavy Bombers. – BANAT NEWS