Andam na ang tanan alang sa 3rd Seminary Fund Run

CEBU - Plansado na ang tanan alang sa 3rd Seminary Fund Run nga gikatakda karong Nobiyembre 30 diha sa Cebu Business Park.

Bisan og aduna kini kadungan nga lumba, wala mabalaka ang mga organizers kun partisipasyon lang ang hisgutan gumikan kay nakakuha na kini’g suporta sa mga tunghaan, sa ubang mga running clubs ug sa running enthusiasts sa MEPZ.

Nagbaha sab gani ang mga sponsors sa maong lumba nga gipasiugdahan sa Cebu Archdiocesan Mayor Seminary Foundation Incorporated (CAMSFI) nga naglakip sa Smart Telecommunications, Timex, ABS-CBN, International Pharmaceuticals Inc. (IPI), Hosanna Printing Haus, Blue Info Club Channel 45, Crossover, 2Big Kinvara Corporation, Graphicstar, Basic Graphics, Nature’s Spring, Julie’s Bakeshop ug uban pa.

Kapin sa 1,500 runners lakip na ang kaparian ug seminarista ang gilaumang moapil sa fund-raising activity nga gibahin sa tulo ka kategoriya -- 10K, 5K ug 3K runs.

Ang 10K run bukas ngadto sa executives ug mga sakop sa nagkalain-laing running clubs, samtang ang 5K alang sa mga trabahante sa MEPZ ug sa mga running priests ug seminarians ug ang 3K niadtong mga entrante nga nagpangedaron og 12-anyos ug paubos.

Mga special nga ganti ang madawat niadtong palarang mga mananaog.

“No cash will be given away as the purpose of this event is not purely competition. It is meant to inform, invite and invoke to the public about the existence of the Seminario Mayor de San Carlos as well as for the renovation project of the 60-year-old edifice,” matud pa ni CAMSFI president Msgr. Guillermo Gorre.

Niadtong interesado moapil, mahimong magpalista sa Philippine Sports Commission (PSC)-7 sulod sa Cebu City Sports Center o dili ba sa Seminaryo Mayor de San Carlos.

Ang deadline sa pagduso sa mga entries hangtod sa Nobiyembre 28.

Aduna kini entry fee nga P150 libre na ang singlet ug uban mga pakapin gikan sa event sponsors.

Alang sa dugang mga kasayoran, mahimong motawag ni Fiel Suico sa 412-7248 o dili ba 0919-7781001. –BANAT NEWS