CEBU - Usa ka accidental head butt ang nahiaguman nila ni Robert Allanic (17-4, 9KOs) ug Carlo Magale (3-4, 2KOs) nga miresulta ngadto sa usa ka technical draw atol sa main event sa Summit Natural Drinking Water “Fight Night” niadtong Biyernes sa gabii didto sa Mandaue City Plaza.
Tungod sa kalit nga pagbundak sa uwan atol sa maong boxing event, nahunong og kadiyot ang away tungod sa pagbanaw sa tubig ibabaw sa ring. Human sa pipilia ka minuto gisugdan dayon ang binakbakay tali sa kanhi World Boxing Organization (WBO) Asia Pacific interim bantamweight titlist nga si Robert Allanic kontra Carlo Magale sa Talibon, Bohol.
Apan sa first round pa lang sa ilang away, wala tuyo-a nga nagkabangga ang ulo sa duha ka mga boksidor nga miresulta ngadto sa pagkagisi sa walang kilay sa taga-Alumnos, Mambaling nga si Allanic. Ang ngil-ad nga pagkagisi sa kilay ni Allanic mao ang nakapaaghat sa ring physician nga ihunong ang away.
Sa supporting bout, gipahunong ni Along Denoy (18-7-1, 9KOs) pinaagi sa usa ka seventh round technical decision si Jason Geda (9-5, 3). Nahimong dakong pabor alang ni Denoy ang one point deduction nga gipahamtang sa referee ni Geda tungod sa pagpang-head butt niini. Tulo ka mga hurado ang mi-iskor og 69-63, 68-65 ug 69-63 pabor ngadto ni Denoy.
Mipakita usab sa iyang abilidad ang “Search for the Next Pinoy Boxing Star” winner nga si Roli Gasca (6-0, 1KO) dihang iyang gipatumba sa round four si Orlan Enriquez (5-8-1). Si Edcel Tuñacao mi-TKO ni Melchor Abcede sa first round samtang si Larry “ Bon Jovi” Canillas mipahunong ni Robert Awetin sa fifth round. –BANAT NEWS