Warriors kampiyon sa 1st Coach Rady Cup

CEBU - Pungtanon nga gipa-ila sa F.Llamas Youth Association (FYA) Warriors kung kinsay angayan ilhon nga kampiyon ug mosakmit sa korona sa 1st Coach Rady Cup basketball tournament dihang ilang gilampurnas ang FYA Golden Eye sa iskor, 92-72 sa ilang rubbermatch sa best-of-three finals sa miaging Huwebes didto sa Vicente Sotto Memorial gym sa barangay Punta Princesa, ning dakbayan.

Gikan sa sikit nga 40-42 halftime diin nabiyaan ang Wariors, kalit lang nagmangtas ang Warriors ubos sa pagpangu nilang Marciel Cadungog ug Chissar Llegunas kinsa parehong sakop sa Mythical Team ug ilang gipa-uwanan og puntos ang Golden Eye nga daw kandila nga gi-ugbok sa kakurat tungod sa 16-6 nga rally sa Warriors sa naghinapos na nga oras sa third period.

Halos wala’y ikasagang ang Golden Eye dihang naghuramentado ang Warriors pagsugod na sa kataposang kuwarter diin wala kapugngi ang ilang pagpabuhagay og 32-15 run kadaghanan niini fastbreaks hinungdan nga wala gyud maka-rekober ang Golden Eye nga kalit lang sab namugnaw.

Hinuon, ang dakung konsuylo alang sa Golden Eye mao nga sila maoy naka-angkon sa MVP ug sa Sportsmanship Award. Si Dominic Enriquez nga kanhi players sa University of Cebu (UC) Junior Webmasters maoy napiling MVP ug si Mark Arias maoy napiling Sportsmanship Award ug pareho silang nakadawat og ganting cash ug certificates of recognition gikan sa tigpasi-ugda sa torneyo nga si Rady Abarintos.

Ang ikalimang sakop sa Mythical Team mao si Adrian Louise Laorte sa FYA Viking Haulers nga maoy naka-angkon sa ikatulong pwesto.

Atol sa yanong awarding ceremony, si Abarintos maoy nangunay og tunol sa mga tropeyo ngadto sa mga mananaug inubanan nilang tournament chairman Restituto “Bugoy” Atillo ug barangay secretary Jojo Chavez nga maoy nagrepresentar ni Punta Princesa barangay captain Rolly Diorico kinsa may gi-atiman nga laing kalihukan.

Sa iyang mubong pakigpulong, si Abarintos misaad nga iyang padak-an ang Coach Rady Cup sa ikaduhang season unya sa Enero sa sunod tuig apan mibahad ngadto sa mga batan-on nga iyang palagpoton kung kinsa kadtong magminaldito ug dili motuman sa mga lagda sa FYA.

Gihangyo sab ni Abarintos ang barangay council ubos ni Kapitan Diorico sa paghatag og suporta ngadto sa FYA kay mao man kini ang katuyoan sa barangay pagpahigayon og sports activity ngadto sa mga batan-on aron mahilikay sila ngadto sa bisyo ilabi na sa paggamit sa ginadiling druga.

Gani, si Abarintos nagkanayon nga mas malipay siyang maglantaw sa unahan nga adunay sakop sa FYA nga madungog isip maayong laki nga varsity player sa kolehiyo ug mitanyag siya og scholarship ngadto sa mga sakop sa FYA nga magtinarung og eskwela kay daku kining garbo sa barangay nga maka-angkon og kaugalingon nilang produkto nga inilang professional.

Sa iyang bahin, nagkanayon sab si Atillo nga dili gyud siya makabiya sa bisan unsang proyekto sa sports ilabi na kay siya maoy nagdala sa maong komitiba dihang usa pa siya ka konsehal sa barangay. –BANAT NEWS