CEBU - Panalipdan sa Sugbuanong bantamweight prospect nga si Rodulfo ‘The Sting’ Sumabong ang iyang way buling nga rekord batok sa beteranong ring gladiator gikan sa Zamboanga nga si Daniel Diolan sa main event karong gabii sa “Halad sa Kapistahan sa Birhen sa Regla” boxing extravaganza karong alas-8 sa gabii diha sa Lapu-Lapu City Sports Complex.
Si Sumabong adunay unom ka daog diin tulo niini pinaagi sa knockout. Si Sumabong mi-iskor og daog pinaagi sa second round stoppage ni Renan Branzuela sa iyang katapusang away nga gitambongan ni WBO bantamweight champion Gerry ‘Fearless’ Peñalosa niadtong Hulyo 30 didto sa Liloan Sports Complex.
Segurong makakuha og atensiyon sa maong boxing card mao ang RWS Super 5 ni Rex ‘Wakee’ Salud batok sa managlahing mga kaatbang.
Ang lima mao sila si Jayson ‘Gladiator’ Siaton, Dave Christian Baliguat, Rob ‘Gun’ Montero, RJ ‘Sharp’ Ano-os ug Renjie ‘Kilat’ Abendan.
Si Siaton makigsangka ni Renan Branzuela sa Bukidnon, si Baliguat makigsinukliay og kumo batok ni Saddam Alin, si Montero makigbinukbukay ni Romano Gelig sa Bohol, si Ano-os makighamag batok ni Ramelo Estra, samtang si Abendan makigbatok ni Jerpol Valero.
Sa preliminary bouts, si Esrael Salud makigharong ni Roberto Tobio ug si Kevin de la Cruz makigsangka ni Samuel Salinato.
Ang mga tiket mapalit sa tag-P50 alang sa general admission ug P100 sa ringside. – BANAT NEWS