Jones gikulata ni Calzaghe

CEBU – Moretiro ang reigning WBO/WBA/IBF/WBC super middleweight ug Ring Magazine light heavyweight world champion Joe Calzaghe nga wala’y buling ang rekord kini human siya milampos sa pagpukan ni legendary boxing icon Roy Jones Jr. sa main event sa “Battle of the Superpowers” kagahapon didto sa Madison Square Garden, New York.

Gipakita sa ‘Prince of Whales’ nga si Calzaghe sa iyang mga dumadapig nga wala mausik ang ilang suporta ngadto kaniya, apan ni-agi una og kulba ang mga fans ni Calzaghe dihang na knockdown siya ni Jones sa first round.

Apan susama sa nahitabo sa miagi niyang away batok ni Bernard Hopkins diin natumba usab siya sa unang round, mibangun si Calzaghe ug gidabodabuhan ang kanhi five-time world champion nga si Jones aron modaug pinaagi sa usa ka unanimous decision.

Ang tulo ka mga hurado ni-iskor og 118-109 pabor sa Welschman.

“Yeah, it was a good shot, but I came back stronger”, matud pa ni Calzaghe.

Ang 36-anyos nga si Calzaghe mipahaguros og mga paspas nga kombinasyon ngadto ni Jones kinsa naugtas og sagang sa matag-kinumo nga mo-igo kaniya. Gigamit usab ni Calzaghe ang height ug reach advantage aron malimitahan ang mga tira ni Jones, nagisi-an usab sa walang kila’y ang 39-anyos nga si Jones nga maoy hinungdan sa pag-agas sa dugo nga mitabon sa mata sa Amerikano.

Daan nang gipamulong ni Calzaghe nga ang sangka niya batok ni Jones mao ang katapusan niyang away ug mopahuway na siya sa natad sa pagpamuksing. Si Calzaghe moretiro nga aduna’y perfect record nga (46-0, 32KOs) samtang ang nagkadugong si Jones natagak sa (52-5, 38KOs) record.

Sa supporting bout, bisan pa man sa nahiagumang duha ka gisi sa kilay nilampos gihapon ang kanhi undisputed welterweight champion nga si Zab Judah (37-6, 25KOs) batok ni Ernest Johnson (18-3-1,7KOs) pinaagi sa usa ka 12-round unanimous decision.

Nagpabilin usab nga wala’y buling ang rekord sa junior welterweight Dmitriy Salita (29-0-1, 16KOs) dihang mi-iskor siya og usa ka unanimous decision batok ni Derrick Campos (17-6,10KOs). - Lemuel P. Maglinte (BANAT NEWS)