Toring kampiyon sa 'Lapu 3-point shootout

CEBU - Nag-agi una og kalisod ug literal nga milusot sa mata sa dagum ang beteranong si Rene Toring sa AC Sports tungod kay nagkinahanglan pa siyang mo-agi og duha ka playoffs una siya mahimong kampiyon sa Lapulapu Basketball League (LBL) 3-Point King pinaagi sa pag-iskor og 17 puntos sa finals batok sa iyang teammate nga si Resty Getubig kinsa mi-iskor lang og 13 puntos sa ilang pagharung sa finals sa miaging gabii didto sa Lapulapu City hardcourt.

Si Toring kinsa igo lang naka-iskor og 10 puntos sa elimination round, naka-abante sa top 10 human iyang gipalagpot ang laing teammate nga si Alex Cainglet sa playoffs ug sa laing player nga si Mark Bolo tungod kay nagtabla man silang tulo sa 10 puntos.

Ang top 10 scorers mi-abante sa sunod nga round diin nagkuha sab og top two scores nga maoy mag-ilog sa korona.

Atol sa laing playoff, si Toring mi-sikor og 17 puntos ug wala kalusot sila si Cainglet ug Bolo kinsa parehong mi-iskor og 11 puntos.

Busa, sila si Toring maoy naka-angkon sa ika-napulo ug kataposang luna uban sa laing siyam ka players nga mao sila si Aaron Pancho, Jonas Bensi, Eldred Bontilao, Maui Arong, Val Arong, Gestoni Casquejo, Tony Inoc, Ronan Isidro ug Getubig.

Nagtabla pa gyud sila si Toring ug Bensi sa parehong 16 puntos hinungdan nga nag-agi nasab siya’g playoff. Si Toring mi-iskor og 11 puntos ug si Bensi igo lang mi-iskor og walo ka puntos busa siya maoy nakigtigi ni Getubig alang sa finals human nag-una’g abante si Getubig sa iyang 21 puntos.

Apan atol sa finals, pabiling kalmado si Toring ug gipakita ang iyang pagka-beterano tungod kay og 17 puntos batok kang Getubig nga igo lang mi-iskor og 13 puntos.

Si Toring maoy nakadawat sa ganting cash nga lima ka libo ka pesos gikan ni LBL sports committee chairman Harry Radaza.

Usa sa misalmot sa 3-point shootout mao ang high school Cebu Schools Athletic Foundation, Inc. (CESAFI) MVP nga si John Marty Pearce sa University of Cebu (UC) kinsa maoy pinakabatan-on sulod sa 25 ka players nga misalmot apan siya maoy nakakuha sa kinaubsan nga iskor nga upat lang ka puntos.

Hinuon, human mapakyas si Pearce sa 3-point shootout, siya maoy mi-angkon sa korona sa Skills Challenge human iyang gitapos ang lumba sulod sa 27 segundos aron pagpalagpot sa laing upat ka finalists.

May 18 ka players nga misalmot sa Skills Challenge.

Ang wala maka-abante ngadto sa top 10 sa 3-point shootout mao sila si Pearce, Cainglet, Junard Premacio, Harvey Villanil, Carlos Miranda, Jesus Saga, Jason Morata, Raymund Clarin, Raffy Quilantang, Jarjar Degamo, John Cabahug, Milfred Sampelo ug Sandy Andales.

Ang LBL ubos ni Harry Radaza mipahigayon sab og slam Dunk contest ug All-Star Game apan ang resulta sa maong duwa wala pa masayri ning pagsuwat. (BANAT NEWS)