7 Pinay makigbinukbukay sa China

CEBU - Pito gyud ka Pinay ang mokarga sa bandila sa Pilipinas sa ipahigayong 5th World Women’s Boxing Championships karong Nobiyembre 22 ngadto sa 29 didto sa Ningbo City, Zhejiang province, China.

Gibutyag ni RP coach Roel Velasco nga bisan og nagkainit ang tension karon apan iyang giangkon nga wala gyud mopakita og kahadlok ang pito ka Pinay nga moharong unya sa laing babayeng boksidor sa tibuok kalibutan.

Moabot ngadto sa 200 ka boksidor gikan sa 44 ka nasud ang gipaabot nga mosalmot sa maong torneyo nga nag-edad gikan 17-anyos ngadto sa 34-anyos. Ang maong away bahinon ngadto sa 13 ka weight classes nga manukad sa pinweight (46 kilos) ngadto sa heavyweight (86 kilos pataas).

Ang mga partisipante sa Pilipinas sila si pinweight Josie Gabuco, lightweight Alice Kate Aparri, flyweight Annie Albania, lightbantamweight Analiza Cruz, bantamweight Redelyn Digmayo, featherweight Ronijen Sofla, ug light welterweight Mitchel Martinez.

Mangulo sa pito ka boksidor si Martinez kinsa milabni sa duha ka bronze medal isip lightweight sa World Championship niadtong 2005-2006 samtang laing gipaabot nga molangkat og daog si Albania nga mihipos og bulawang medalya sa SEA Games niadtong miaging tuig sa Thailand. (BANAT NEWS)