Slaughter bayani sa Pulpogan

CEBU - Si Gregory Slaughter miposa og sayes puntos sa nahabiling segundos sa final quarter aron pangulohan ang Pulpogan pagpukan sa Lamac, 78-75 sa 2008 Consolacion Fiesta Cup Inter-Barangay Open Basketball Tournament didto sa Consolacion Sports Complex.

Ang 6-foot-11 center sa bag-o lang kampiyon sa 8th CESAFI University of the Visayas (UV) Green Lancers mibugha og 18 puntos sa maong duwa.

Ang three-time Most Valuable Player nga si Slaughter giabagan sa point guard sa M. Lhullier Kwarta Padala Cebu Niños nga si Stephen Padilla kinsa mipugnit og 17 puntos, samtang ang teammate ni Padilla nga si Jayford Rodriguez midunol og 10 puntos.

Ang Lamac ni kanhi collegiate ug pro star Gil Demape nag-ung-ong na sa ganghaan sa kadaugan dihang nilabaw kini og tres puntos, 75-72 sa nahabiling 1:08 sa duwa.

Apan sa usa ka pamilok, giilog sa Pulpogan pinaagi sa paglusad og 6-0 run. Aduna pa untay kahigayonan ang Lamac sa pagpadala sa duwa ngadto sa overtime, apan nasipyat ang duha ka three-point shots nga gitira nila

ni Demape ug Bobby Hatague.

Sila si Ritchum Dennison, Ariel Mepaña ug Chris Victor Deputado nagkumboya og 34 puntos alang sa Pulpogan.

Sa ilang bahin, si Hatague maoy nangulo sa Lamac sa iyang 20, gisundan ni Jimwell Torion sa iyang 12 puntos ug Jabe Delfino sa iyang 11 puntos.

Ang tulo ka bulan nga kompetisyon suportahan sab sa municipal government sa Consolacion ubos sa liderato ni Mayor Avelino Gungob Jr. ug Vice Mayor Ember V. Alinsug ug ingon man ni Poblacion Oriental Brgy. Councilor Paul Alelu Q. Flores.

Sa laing bahin, ang Cansaga Selection nakaikyas gikan sa mga kamot sa Flores Cousins bitbit ang 94-91 nga kadaugan atol sa usa ka exhibition game.

Puntos Matag Usa

Pulpogan (78) -- Slaughter 18, Padilla 17, Dennison 9, Mepaña 8, Deputado 7, Tagalog 4, Calo 2, Villanil 2, Lao 1

Lamac (75) - Hatague 20, Torion 12, Delfino 11, Demape 8, Malinao 8, Llera 4, Omolon 4, Amores 4, Toring 3, Espinosa 1. – BANAT NEWS