Atan Guardo miguwang hari

CEBU - Nagdilaab ang kainit sa Atan Guardo/MECI Marketing nga nakabuntog sa bangis nga Loyola, 87-77 sa ilang tinaktakay nga kampiyonato aron maangkon ang titulo sa Banawa Riverside Athletic Association (BRAA) basketball league sa Banawa open court.

Ang duha ka kampo parehong mipakita og maayong labok ug pulos sab dili magpapilde hinungdan nga nagtabla ang iskor paghuman sa first quarter, 31-all.

Ang Loyola mipauwan og mga puntos sa ikaduhang kuwarter aron pagposte og tres puntos nga bentaha, 49-46 paghuman sa unang-duha ka kuwarter, apan ang Atan Guardo mibawos pinaagi sa paglusad og 23-12 nga rally sa third quarter aron pagbaton og otso puntos nga labaw, 69-61 dayong entra sa katapusang kuwarter.

Nakontrolar sa Atan Guardo ang momentum hangtod nga ilang gitapos ang duwa pinaagi sa pagposte og 10 puntos nga kadaugan.

Si Rambo Labay maoy nangulo sa Atan Guardo sa iyang game-high 31 puntos, samtang sila si Michael Cinco ug Richard Gubaton nagkumboya og 29 puntos.

Puntos Matag Usa

Atan Guardo (87) -- Labay 31, Cinco 15, Gubaton 14, Villarosa 4, Ranile 2, J. Panerio 2, Mulchandani 2, Limosnero 2, R. Panerio 2

Loyola (77) - Gabucan 25, Cabral 17, Abelgas 16, Minoza 8, Baratilan 7, Mercado 4. – BANAT NEWS