CHSBL

CEBU - Ang Camotes High School Basketball League kon CHSBL gituohang maoy yawi nga makapalambo sa natad sa basketbol sa upat ka lungsod sa isla sa Camotes.

Nadasig ako sa pagsuwat niining artikulo tungod kay usa man ko gitawag og 'true-blooded" Porohanon. Ang Poro usa sa mga lungsod sa Camotes nga gilangkuban sa San Francisco, ang yutang natawhan ni Jervy Daño nga nabantog na kaayo nga si Patani, sa Tudela nga duhay mayor ug ang Pilar, ang pinalanggang lungsod ni Ryan Mark 'Boy Abunda'   Borinaga. Nagkamang pa ko, didto na ako nadagsa sa Poro kay gisapo ako sa akong mga apohan, apan ang akong mga kadugo   taga Consolacion. Ang akong Mama (Malagar) ug taga-Liloan ang akong Papa (Pilapil), apan Malagar akong gidala kay usa ako ka illegitimate child.

Mas labaw pa akong nadasig kay ang nangusog sa pagpaluyo ug nagmugna niining CHSBL dili mga inilang lider ug dili sab mga negosyante kon dili usa ka American kinsa maoy nagpakabana sa ubos kaayong kalidad sa basketbol sa Camotes. Ang wala makita sa mga politiko didto, nakita sa langyaw ug daku kining insulto ngadto kanila nga wala gyu'y kamaohan gawas lang sa "tigbakay" ug "mahjong".

Ang akong amigo nga Amerikano nga si Bruce Cunningham sa Fort Wayne, Indiana, USA, atua na karon manimuyo sa San Francisco, Camotes uban sa iyang Pinay nga asawa nga si Dixie. Taud-taud na kaming nagkahimamat ni Bruce didto sa headquarters sa Cacoy Doce Pares diha sa dalan C. Padilla.

Hapit mahurot ang akong bilib ngadto ni Bruce apan gibinlan lang nako'g gamay alang sa ubang kahigalaan kay siya'y labing unang Amerikano nga akong nailhan nga naggamit og email address nga "[email protected]." Gilaliman ka niana, Amerikano motawag og Cebu nga paraiso nga ang uban ganing lumad Sugbuanon milayas na man gani sa Pilipinas.

Gani atua karon mibalik sa America si Bruce kay kuno mangita siya'g pundo aron magtukod og gamay'ng gym (Golden Gate Gym). Utokan kaayo kini si Bruce kay daling misantop sa iyang huna-huna nga ang address sa mga molupyo sa San Francisco, Camotes mahimo mang isuwat nga San Franciso, CA. Apan atong klarohon nga kanang CA dili California kondili Camotes.

Sa labing unang higayon sa kasaysayan sa isla sa Camotes, karon pa ako makadungog nga adunay laing tawo nga nagpakabana sa natad sa basketbol.Kun madayon kining CHSBL, hayan madugangan ang mga makamao moduwa'g basketbol sa Camotes.

Sukad ako nagsugod og suwat og sports sa The Freeman dul-an na sa 20 ka tuig ang milabay, tulo pa lang ka taga Camotes ang nahimong varsity players sa college -- ang duha niini sa karaang CAAA ug ang usa anaa karon sa CESAFI. Sila mao si Felix Abellare Jr. sa Poblacion, San Francisco nga nakaduwa kanhi sa Cebu School of Arts and Trades o giila karon nga Cebu State College of Science and Technology (CAAA), Ruperto Dalumpines sa barangay Mabini, Poro nga nakaduwa sa University of Cebu (CAAA) ug si Eliud Poligrates sa barangay Mercedes, Poro nga nagduwa karon sa Southwestern University sa CESAFI.

Daghang maayong moduwa og basketbol sa Camotes apan walay pormal nga training. – BANAT NEWS