CEBU - Ang Cabangahan ug Panoypoy mikulata sa ilang tagsa-tagsa ka kaatbang sa nagpadayong aksiyon sa 2008 Consolacion Fiesta Cup Inter-Barangay Basketball League didto sa Consolacion Sports Complex.
Ang Cabangahan milansang og 82-77 nga kadaugan batok sa Poblacion Occidental sa engkuwentro sa kanhi commercial stars, samtang ang Panoypoy yanong miangkon og daog pinaagi sa paglubong sa Tayud, 87-62.
Si kanhi Cebu Gems forward Michael Almonte maoy nangulo sa opensiba sa Cabangahan pinaagi sa pagbagdok og 29 puntos, gisundan ni Rey Maraño sa iyang 17 puntos ug Abe Galinato nga mibugha og 11 puntos.
Ang Poblacion Occidental gipangulohan sab ni Milfred Sampilo sa iyang 17 puntos, gisundan ni Leodi Garcia ug Jay-R Pepito nga miabuno og 14 puntos matag usa, samtang si Jerry Jaca midiga og 12 puntos.
Sa laing engkuwentro, si Rene Toring mipabuhagay sa iyang abilidad ug miligwat og 24 puntos aron pangulohan ang Panoypoy.
Ang tulo ka bulan nga kompetisyon nga usa sa mga highlights sa tinuig nga kapistahan sa Consolacion karong Oktobre 29, gipasiugdahan ni Consolacion Vice Mayor Ember V. Alinsug uban sa suporta ni Poblacion Oriental barangay councilor Paul Alelu Q. Flores, ang sinaligan kanhi sa Far East University (FEU) Tamaraws sa UAAP.
Puntos Matag Usa
Unang duwa:
Panoypoy (87) -- Toring 24, Dionson 23, Quilab 19, Selva 14, Janno 7
Tayud (62) -- Momo 21, Mier 16, Pepito 9, Ibale 8, Mercado 6, Retiza 2
Ikaduhang duwa:
CabangAHan (82) -- Almonte 29, Maraño 17, Galinato 11, Magdadaro 8, Miñoza 7, Lastimoso 6, Cepriz 2, Maraño 2
Poblacion Occidental (77) -- Sampilo 17, Garcia 14, Papito 14,
Jaca 12, Cincoflores 6, Maloloy-on 6, Maglasang 3, Pepito 3, Reuyan 2. – BANAT NEWS