100 shooters mag-abot karon sa 3rd Gullas Cup Shootfest

CEBU - Sugdan na karon ang duha ka adlaw nga 3rd Gullas Cup Shootfest diha sa Talisay Aqua City Gun Club sa Maghaway sa dakbayan sa Talisay.

Kapin sa 100 shooters gikan sa nagkalain-laing gun clubs lukop nasud ang gipaabot nga mosalmot sa maong kompetisyon.

Mangulo sa competitors mao ang mga sakop sa Talisay Aqua City Gun Club nga pangulohan ni Talisay City Vice Mayor Aberdovey Belleza.

Usa ka mubong programa ang ipahigayon diin si Cebu First District Rep. Eduardo R. Gullas maoy pinasidunggang dinapit ug mamumulong.

Sundan kini sa range officer’s match ug dayon ang regular shooter’s contest.

Ang kompetisyon gibahin sa nagkalain-laing dibisyon -- open, modified, standard, production ug revolver standard.

Ang shooters moagi og pito ka hut-ong ug kini mao ang “wherever you go,” “dive show,” “running man,” “pop it,” “plate and poppers” ug “setdown shooters.” - BANAT NEWS