Globe Osam midaog korona sa 7th Thirsty Hoop

CEBU - Gipamatuod sa Globe Osam ang ilang kahawod dihang ila na sab nga gipilde ang House of Hope, 65-63 sa tinaktakay nga kampiyonato aron paglangkat sa korona sa 7th Thirsty Hoop Jams Inter-Company Basketball Tournament didto sa BRIGHT Academy gym sa barangay Banilad, ning siyudad.

Atol sa ilang unang panagbagat sa eliminasyon niadtong Agosto 24, ang Globe Osam midaog sab batok sa House of Hope sa iskor nga 96-88.

Sa gihapon, si Tabay mao ang topscorer sa Globe Osam nga miligwat og 16 puntos. Miabag sab sila si Tommy Abasolo ug Albert Villaber, kinsa nagkumboya og 25 puntos.

Ang Globe Osam ug House of Hope nagpuli-puli og kawat sa labaw halos sa tibuok duwa nga nakapainit sa duwa.

Unang miabante ang Globe Osam sa iskor nga 17-14, apan ang House of Hope mikitkit sa labaw paghuman sa first half, 34-33.Sa paningkamot sa Globe Osam mitubo og balik ang ilang labaw ngadto na sa kuwatro puntos, 49-45 paghuman sa third quarter. Sukad niadto kontrolado na sa Globe Osam ang duwa hangtod nga nadagit ang dos puntos nga kadaugan.

Sila si Joseph Filoteo ug Amodia maoy nangulo sa House of Hope nga miani og 14 puntos matag usa, gisundan ni Jimmy Abello sa iyang 13 puntos. Ang sinaligan sa House of Hope nga si Roel Patunob miugkat lang og dos puntos.

Sa laing aksiyon, ang VECO maoy miangkon sa ikatulong dapit human midaog pinaagi sa default batok sa Thirsty Juices and Shakes.

Puntos Matag Usa

Globe Osam (65) -- Tabay 16, Abasolo 13, Villaber 12, Bardillas 9, Atillo 6, Cortes 3, Gera 2

House of Hope (63) -- Amodia 14, Filoteo 14, Abello 13, Membrero 8, Cabarrubias 6, Castañares 4, Patunob 2, Villamon 2. – BANAT NEWS