Milendo andam na nga modepensa sa korona
CEBU - Andam na si WBO Asia Pacific miniflyweight champion Milan Milendo nga modepensa sa iyang bakus batok ni Tanzanian challenger Juma Fundi karong Oktobre 30 adto sa Atrium sa Limketkai Mall sa Cagayan de Oro City.
Ang maong away gipasiugdahan sa ALA Promotions sa abag ni Misamis Oriental Governor Oscar Moreno ug sa Leolet Promotions.
“This event will showcase the Mindanao fighters,” matud pa ni sportsman Antonio L. Aldeguer.
Ang umaabot nga away ni Melindo batok ni Fundi mao unya ang ikaduha niyang title defense human milampos sa una niyang pagdepensa pinaagi sa unanimous decision batok ni Panamian Carlos Melo niadtong Hulyo.
Ang bangis nga si Melindo wala pa makatilaw og pilde sa 16 niini ka away, samtang si Fundi nakatilaw sa labing una niyang pilde atol sa ilang sangka sa World Boxing Association (WBA) Intercontinental light flyweight batok ni Richie Mepranum niadtong Hunyo.
Sa supporting main bout, si WBO Asia Pacific Youth lightweight champion Jason Pagara makigharong ni kanhi RP lightweight champion Arnel Porras. Samtang si WBO Asia Pacific Youth welterweight champion Eusebio Baluarte makigbinukbukay ni Cris Alag. Mokompleto sa undercard mao sila si Weng Haya batok Jaime Barcelona, Romeo Jako batok William Jorge, Jerson Mancio batok Saldy Calamba, Mark Tapalez batok Roilo Golez, Mark Anthony batok sa TBA boxer ug Dondon Tumala batok sa laing TBA boxer. (BANAT NEWS)
- Latest
- Trending
