CEBU - Gipukan sa Cebu Movers ni playing coach Boy Te ug ingon man sa G&S International ni Don Guillen ang ilang tagsa-tagsa ka kaatbang aron pag-abante sa finals sa Guadalupe Athletics Association (GAA) 9th Founder’s Cup 2008 didto sa Guadalupe Sports Complex.
Ang Cebu Movers puwerteng paninguha aron maangkon ang 68-64 nga kadaugan batok sa Team MELO, samtang ang G&S International mipulbos sa AC Sports sa iskor nga 84-77.
Ang Team MELO nagsige og gukod gikan pa sa sinugdanan ug diha na kini nakatilaw sa labing unang labaw sa katapusang gutlo sa fourth period, 64-63 pinaagi sa triple ni skipper Lito Ocampo.
Apan ang Cebu Movers daling nakarekober ug nabawi dayon ang labaw pinaagi sa krusyal nga mga tirada nila ni Joel Alquizola ug Dodong Elizalde.
Si Vincent ‘Inting’ Reyes maoy nangu sa Movers sa iyang 20 puntos, samtang si Alquizola miamot og 15 puntos ug Elizalde mitampo og 10 puntos.
Sa laing bahin, si Jumie Ararao mi-iskor og 38 puntos aron pangulohan ang G&S International. Giabagan sab siya nilang William Jabines, Bars Miñoza ug Eric Suan nga pulos mi-iskor og double figures.
Si Rene Escuyos maoy topscorer sa AC Sports sa iyang 25 puntos, gisundan ni Joel Rances sa iyang 18 puntos.
PUNTOS MATAG USA
Unang duwa:
Cebu Movers (68) -- Reyes 20, Alquizola 15, Elizalde 10, Ancot 7, Lodoña 4, Labra 4, Te 4, Suzara 2, Posadas 2, Leyson 2
MELO (64) -- Ocampo 18, Fernandez 10, Gelig 10, del Rosario 7, Mendoza 5, Ochea 4, Barade 4, Baclayon 2, Mediano 2, Hinacay 2
Ikaduhang duwa:
G&S Intl. (84) -- Ararao 38, Miñoza 10, Suan 10, Jabines 10, Ladaran 7, Matudan 4, Labandero 3, Guillen 2
AC Sports (77) - Escuyos 25, Rances 18, Menternel 8, Ibo 8, Cortes 6, Ancot 5, Lopez 5, Bacalla 2 (BANAT)