Alaska-Abbya misakmit korona sa Better Run

CEBU -  Ang Alaska-Abbya Team (Viclab) ni coach Chris Rible milampurnas sa Left Over (Team E), 82-61 aron pagsakmit sa korona sa Better Run basketball tournament kaniadtong Domingo didto sa Mambaling gym sa dalan Ma. Gochan, ning dakbayan.

Daw sa giharian sa iyang pag-antug si Andot Ladonga kinsa nangigo pag-ayo sa iyang mga tirada sa gawas aron pangulohan ang opensa sa Abbya pinaagi sa iyang 22 puntos. Nakakuha sab siya og maayong suporta gikan nilang Samuel Buaya ug Demy Pesquera nga mibugha og 18 ug 12 puntos matag usa.

Ang ilang team manager ug Mambaling barangay councilor nga si Victor Laborte maoy midawat sa championship trophy.

Wala sab hinuon maglaway ang pilderong Left Over kay giangkon sa ilang top gunner nga si Melior ang MVP award. 

Sa maong duwa, si Melior mi-iskor og 13 puntos, apan si Calvo maoy nangu sa pilderong koponan pinaagi sa iyang 18 puntos.

Sa laing bahin, ang Better Run Second Conference (Christmas League) gikatakdang sugdan sunod bulan.

Ang liga gitukod ni ex-UV Lancer ug kasamtangang CESAFI deputy commissioner Danny Duran.

PUNTOS MATAG USA

Alaska-Abbya (82) -- A. Ladonga 22, Buaya 18, Pesquera 12, C. Ladonga 6, Ebo 6, Tubog 4, Jumawan 4, Caburnay 2, Managaytay 2, Ramos 2, Laborte 2

Left Over (61) -- Calvo 18, Melior 13, Llamado 13, Medalla 6, Cañete 6, Valle 3, Porral 2 (BANAT NEWS)