M'bikefest sa Danao gitakda

CEBU - Dul-an sa P40,000 ang gigahin nga ganti alang sa top performers sa 2008 Danao City Road and Mountainbike Competition karong Domingo nga anha manukad sa city hall.

Kapin sa 100 ka entrante ang gikatakdang magbangga sa racer ug mountainbike events.

Ang road race adunay upat ka kategoriya -- A, B, C ug D.

Ang mga entrante sa class A ug B mosubay sa Danao-Ilihan-Danao route, samtang ang laing duha ka kategoriya mosubay sa Danao-Lugo-Danao route.

Ang top 10 winners sa class A ug B makadawat og ganting salapi, ingon man ang top three finishers sa class C ug D.

Sa laing bahin, ang   mountainbike gibahin ngadto sa lima ka kategoriya -- open, juniors, seniors, masters A ug B.

Ang mga partisipante magtige sa flat ug technical route.

Ang nag-unang tulo ka mga mananaog makadawat sab og ganting salapi. – Banat News